Pâhtâ yùmnak lah bäcàngnak
Yùmnak ci cuh ngyùmnak ah kya ci.A i bo kùkù,tumat kúkù yùm mhngî ah phäh ah mät noh mät yùm mhngî nak om neh acun yúm ah phäh ah thüî-hlêinak,ngngaih hävâng nak kä om neh mlùng ngngaih théing hleih ghin om nak ah kya ci. Vâng ah pyéin ung yùm mhngî nak kä om ba neh ngngaih ngshak nak a om lo ung kä bä kä càng ci yúm mnài tu ah phäh ah chêi oh neh ngshak ci gui a om lo neh mlùng ngngaih kä htí htaih ba neh akya lo cuh pyéin ah kya ci. Cun cuh hmat phya khai pyéin ah akya ung.khoh-tang tumat kùkù yùmnak-ngah-tüh tumat kùkù yùmnak.khò bo kchàng bo tumat kùkù yùmnakAkkhân ung kah tumat kùkù yùm tû tê ah phäh ah ngngaih ah kä kya lo neh ngyûngyòn nak ba vai a om lo ah a kya ung yùmnak hävâng lo ci cuh kä yùmnak ba ah kya lo ci.Khoh-tang ngùi ghùi tumat kùkù yùmnak.Kchàng gui cuh khoh-tang ngùi ghùi yùm ci gui.Akdá pí thà ci gui cuh ami mät noh ami mät ngyùm ci gui.Hngu hmat tu ci gui no phih yùm mnài mhlüng mtâi tu ci gui. Cun ah yùm mnaì mhlüng mtâi nak cuh shi-kyu ne bo kyai,tûi mêi ne bo kyai,mguk k’éi mghêim k’ò no a lák ung bo kyai a u no phih kä yùm mnài ba ci. Ngah-tüh tumat kúkù yùmnakKhòmdek ah kkhân ah ngah-tüh hnguh hmat nak gui akdá a om nak ung hnguh hmat kchàng ciah a ngmìng tháng ci cuh kä dá ci. Cun ah hnguh hmat kchàng gui ung na tüì na k’ä ci kä yùm ci gui phih om ci.
Cun ung Aristotel ni Plato ni ah hlô ah ami hnguh hmat phih ami ngmìng tháng neh Kkhânpùghí ami yùm phih ngah-tüh mtùmcoih nak (philosophy)ci on mdáng ci gui. Kchò Kchàng gui läí cuh cun ah akpüh akkheh ah ngah-tüh mtumcoih nak akdá kä om ci.Ami tukkaih mghû ngthâ,ami ngmùi ngmang lah ami pùghí pá ah mcó mthêi màn gui on ami bùìchúm gui cuh mtùmtäng neh yùmmnài ci gui. Catholic Htahtana kä gok lo pha ung Kchò gui ah yúm gui.Kchò gui cuh pahta yùmnak kä gok lo pha ung a i hlu lam ah phih khò noh a ci ah ngngài ci gui.Ami ngploh ngkheih góigê gui cuh khò no a bi ah ngngài ci gui.RC gok lo neh sèi tûi,sèilùng têipâi lo hleih gáigong nak ami hnguh lo bà kòn ah avan cuh khò no a bi ah kä kya ciah hmat lo ci gui.Acòyah ùk nak gok lo neh sèi im cô lo neh sèilùng sèitûi on ami ngkuh ngmàn lo kòn ah avan cuh khò noh a bi ah kä kya ci ah hmat lo ci gui.Cung phih tumat lah tumat ngcuh ngcannak a om lo ung khò am apnak ung pâhtá yùmnak yat lo tu pang láng hleih phih avan ghep noh yùm ba ci gui.Avai hlü ah lungkhò ngcuhngcan lo ah akya ung hmà ci lam ah a i ah bo tah kya lo ci.Ngploh ngkheib ne bo shi kyu ne bo acun ah kum ah kä kya ung khò khngüp bo khngì kchâ kä phlän hleih tumat kùkù ah kya täng täng ciah van noh yùm ci.
Cun kon ah Kchòthùng yùm ba ci gui no pûi kaih neh teng ci gui.Ai mtùi muh neh kä cun ung kshìng lém neh kcha ci gui.Acun gui cuh akcàng ah phih va kyam vü ciah yùm u netah pâhtâ yùm lo ci gui noh phih hlôi yeh neh ngngaih na ci gui.Acun gui yùm ci gui cuh ni kshé mcha neh pâhtâ ngshikcà shûi ktä nak ci netah yùm ci gui ah kä kya ci.Avai hlü ah Bói Jesu cuh Budha khò ah Tebet ah hteit neh tàkò a gah vai ngthêi tu ci ciahmm hlêhlakneh ami pyéin cuh läk dütm neh pyéin tu ci gui.Akcàng ah ktäih neh teng neh ngshîkcà lo ung van noh ami hmat lo cuh Bói Jesu khòmdek ah kkhân ah a om yah ung Tebet khò ah Budha yùmnak kä gok pha gé ci.Bói Jesu a ngtüî kon ah AD phya kchuk yah yung ah vah Budha yùm nak gok ci.A khòkum 33 ung shì netah ghìng lo ba ca Bói Jesu cuh Tsbet Khò ah hteit neh phùngtakò ânâ a ngthêi tu ci cuh hngu hmat ciah phäh ah pyéin gaih vai kya te ci cuh i kä hngu hmat ciah phäh ah kyihkyok kshé ca hlêhlak nak ah kya ci.Cun ung Bói Jesu noh a mthêi nak ung bä càng nak noh ning kphyón gui khai ci ci.Hlêhlak neh kä gah ah akcàng ah om kya ci gui shùilèi hngu hmat neh yùm nak cuh ngóigüt khänghtekm hleih pâhtâ yùm nak ung ngyung ci.
Hlêhlak nak ung ngyung cuh a shäng dí maih hnging ci.Acun ah kya hleih Bói Jesu noh The truth will set you free ciah khòmdek kchàng van am a pyéin ah kya ci.Acun kya hleih Bói Jesu noh a mdüih ah Catholic Htahtana noh yùmnak on a ngkhîngngkhông lo ung Catholic Htahtana cuh lam kä hmâ hnging ci ciah a mthêimthàng ah kya ci.A i ah kya hleih ci ung htâhtanâ mät noh mcüm neh yùm düt ah kä kya neh shùi ktäih neh bä cäng ci hman hman ah hngu-hmat neh a u noh phih pâhtâ a yùm vai ah mthêi mthâng ci.Avai hlü ah Bói Jesu a ghin lo ba ah mòòng,Nú Maria cuh kat kä om neh ngtüí neh Kkhânpùghí ah Nú ah akya ah mòòng cuh akthúk ah mtùmcoih ngah-tüh nak on mtói neh mthêimthàng ci.Acun ah phäh ah Kchòthùng ah hlô ah thùng màn yò màn düt ah kä kya neh bä cäng nak on mtói neh yùm vai ah a mthêimthàng cuh khänghtek ca kya ci.
