Mindat k’taigü Manggo, Lukse Parish gui ah ng’htòi k’om Tamah saya gui ah ng’bum neh k’taigü nak bi ci gui.
2026 kum, Mindat k’taigü Manggo pum ung Tamah saya gui ah k’thagui laknak ba ah ng’thei ng’thang nak gui cuh parish ng’htòi gui phäh phäh ah binak ung, Lukse parish gui ah ng’htòi ung phih October 26-29 k’hngüp gui, Luks St. Mary ng’bum im ah ng’htò neh bi tu. October 26 ung gok lo uneh, 27-28 ung a k’hngüp pum lah 29 khongoi tang ah chüt a lüng ah ng’thei ng’thang netah, 29 kho k’oi täng ah hteit ba ci gui.
Cun ah ng’thei ng’thang nak ung, saya gui noh ami m’lung k’kyong ah ami ghon ah k’chü m’kha cuh: “Boi Jesu ung mi yumnak a k’thai ah mi m’ghün ba ko; Boi Jesu ung mi ng’pyang ng’tham ba ko; Evangeli ng’thu k’ni mi pyein khai ah tüi gui ah mi kya ko” ah kya ci.
Lukse parish ungkah 2, Thilin ungkah 4, shingbok ungkah 5, Chat ungkah 2, Vungkhum ungkah 4, Kihta ungkah 6, Shet ungkah 4, Cüihkheh ungkah 3 lah Shet ungkah, Pa ng’vai 1, ami ng’dòn ah 32 lo ci gui.
Ami ih omnak vai lah ami ei ok vai gui läi cuh immah ah kya ca fr. Constantine Thang Aung Thang noh khòngmang hleih, Lukse, Chaghem, Mevong lah Khoilung, Shit-hmoi k’om yumtu k’chang gui noh ami mät ah thui-an, shing m’htai lo püi uneh ng’thong ng’thot neh shòng cik tu m’bei gui ci gui.
Ami ng’thei ng’thang ah among lam läi ung, Msgr. John Om Se noh, Tamah saya among lah ngami noh ami hnguh hmat khin gui; Fr. Joseph Ki Khui Om noh, Mindat k’taigü manggo ung, a k’hmo k’chang gui ompüi neh m’htei ci gui noh ami läk vai ah Code of Conduct cuh 5 vei m’thei gui ci.
Missa khongmang gänap ni, ng’thu k’ni m’thei m’thang vai ni, Boi ah shihla m’hlüng m’tainak vai gui ung, fr. Sebastiian Khaw Gei Ghung, fr. Constantine Thang Aung Thang, fr. Paulinus Phäi Ha, fr. Timothy Ling Maung ni noh khongmang neh bi pe gui ci gui.
Lukse Parish Choir ung Ghung Myu Mang noh khongmang hleih, choir ungkah k’hmo k’tho gui noh yih ng’vah tu pe gui uneh, k’hngüp yah ami ng’shong yah ung, ng’äi ng’om khongmang ng’thei tu püi gui ci gui.
Video lah tatpungyaik vai lah htinko vai tang ah fr. Timothy Ling Maung lah Paul Shing Ki Gei noh mamong naneh bi ci goi.
St. Francis mamah gui noh, phaya kyong pyantham vai lam ni, mei a ng’hloi vai phäh teng neh bi tu pe gui ci gui.
October 29, k’hngüp yah 11:30 ung, ng’thei ng’thang m’chüp netah, photo, ng’yaik ni, tumat täi yah ng’shi k’ca gui ni, ngui hta khoih hngah gui vai ni, bi netah, k’hngüp ei ei neh ng’pai ba ci gui.
Ng’khai ng’lang ca yumci k’tu ah tu m’bei lo tui ah kon ah Mindat k’taigü Manggo noh phih hlü ci gui ah ng’kho ung mang vai lah, ami hteh htonnak vai ngui a ng’don ah 4,500,000 MMK mang pe gui ci.
Shin ah ng’thei ng’thangnak ung lengnak ungkah noh a ng’phleh ah chüt na m’htei gui ca Khanpughü kami shümhmat ci, abä ni. Mindat k’taigü Mang lah khongmang ci gui, ng’lunglak na tu cigui, lo tu cigui, ngui ghui lam ni, k’taigü nak on ni, k’thagui ni, ei ok vai gui pe tatu ci gui avan, ami bä ni. Khanpughü noh nami van ah khan ah a ng’thu ning m’shen gui hlä.
