Ngthûkní Ng’ThêiA Ng’Bäm (3)

3.Bä ca Ng’Thûkní ah a thúk k’phlàn ca Ng’Mùimchà K’Théing
109.Bä ca Kyanca ung K’khân pughi cuh kchang gui am kchang gui ah thùng yò man ah nghta püi ci.NgThukni cang hleih a thúk k’phlàn vai ca teng ci cuh kchang ca kguk gui noh akcang ah a i ami pyéin hlü lah K’khânpughi cuh cun ah ca kguk gui ah kchi nglung gui on a mdang hlü ah amoong alam ah K’khân ah mlung ngngaih tha vai.
110.Bä ca ca kguk gui ah bü cèng nak shuilèi neh hnguh hanging vai ca teng ci cuh cun yah ung ngami ah amoong alam thùng yo cun yah ung ami Mang ah ca kchi nglung,ami mlung ngngaih ami nghtà ngko ah nì lam puma pyéin ni gui cuh ngngaih na neh ktäih vai.A ah kya hleih ci ung bä cang nak cuh ni lam ahlü ahngäi on mdang nak ung om mòòng a hlü hlü on gukthennak,ma lam mòòng ng’äi ng’om gui lah ahei ca guk ni lam gui on ahlü ahngäi ah mdang neh gu hnging ca kya ci.
111.NgThukni cuh NgMui MCha KTheing ah mthämhla nak gah ca kya neh cang ca a thúk k’phlàn nak lam ung täng neh ktúng ca ahei lam om neh cun ah lam kä om vai hlü ung NgThukni cuh a hngùn kkà ah kya khai.”NgThukni teng neh a thúk k’phlàn lo ung
cun ah htitheing ca Kyanca guk nak ung mthämhla ca NgMui MCha akkhang on vah k’phlàn vai.”
Bä ca Kyanca ah a thúk cuh NgMui MCha ah mthä mhla ah täng ah k’phlànnak ung mtäng neh ngngaih pit vai ah lam kthum a om ah mòòng akhngih nak Vatican NgBum NgHtoinak ah pyeinpit noh mdang ci.
112. 1.Bä ca Kyanca avan ung boi ca amoong lam on a nggui nghlui ah K’khân ah mlung khnga nak vai”ami mcum mhlei guk then ah ca NgBum gui cuh ngkhoi ngcha tu pang hleih phih Bä ca Kyanca cuh K’khân pughi ah ät ca a pongpüi ah phäh ah kong ät khai.Acun ung Boi Jesu Christu cuh a nglung kthük mlung mshin ah kya neh acun ah mlung cuh Paska mü ei ei nak ung lèng neh mdang neh do chang ci.
”Boi Jesu ah MLung”ciah ca ngbäm cuh Kyanca mshüm neh cun noh a mlung ngdang hlak neh Bä ca Kyanca ung kä ngshing veih chütah akchün ah kä yaica pha ung kä mdang ci .Cun tu lang pang ah phih bä ca Kyanca cuh akchün ah ayâica ung lèng neh a mdang nak cuh a i nì lam on a thúk k’phlàn vai cuh mtumcoih ngah-tüh neh akni ah hmat lo hanging ci gui.
113. 2.”Htahtana ah ghìng om câ cá thùng yò”ah kkyong ah ka noh Bä ca Kyanca na teng vai.Htahtana ah pa ngvai gui ah ami pyéin ah täng ah Kyanca cuh khäng htek ca mdang nak kä cung hmat nak ah hmattan gui ah guk ah kä kya neh aktung ah Htahta na ah mlung ung guk ah Kya ci.A I ah Kya hleih ci ung Htahtana ah thùng yo gui cuh K’khânpughi ah kchi ngthu on mhtei kon ah Ng’Mùimchà K’Théing cuh Htahtana ah Bä ca Kyanca ah NgMui MCha lam k’phlàn mdang nak lam mshüm neh mdang ci.
114. 3.Yumnak on ngpak hleih yum äp nak cuh kphyek kpai lo ung hmat vai ah moong”Täng chächä ca yumnak gui ngngaih nak”ciah pyéin nak ung yum äp nak ah cang ciah amoong ama tumat hti lah mdang nak avan on a nggui ngkhong cuh pyéin ah Kya ci.