K’hmo Hta Gui M’thei Nak

  Ng’kyäng lo ci ci gui-ah mi hta k’hmo gui cuh mi mät-ah ng’ngaih-ah mi täk gui-ung ngami-ah ng’ngaih-awn kä täng neh kä ng’hloi onak gui phih da hnging ca kia ci. Caw kia hleih mi m’hting mi m’cäi lo gui-ung ma neh mi na ng’shäm nak gui lah bi chin gui cuh ni m’thein tub a gui hlü nei.

        K’hnga kä k’phlang gui pha-ung ma neh ng’ngaih gui vai

Vuuk nak kat nak ami bui awt lo-ung ma neh m’cäi gui nak, beit gui nak-ah tah i kia te ci-ang ci cuh ma neh ng’shi k’thäh gui neh ami bui awt lo gui ami na m’thein tu cuh ma neh ng’ngaih peit gui vai.

        M’hting nak lah k’bäi nak gui cuh ng’chak khai-ah k’hmüt vai.

K’hmo k’tho gui cuh  hla tha nak ak’da ng’ya tu hlü lang pang u hleih phih m’hitng nak lah k’bäi nak gui cuh hlü ba hnga ca kia ci. A k’tung pi-ah Phone mang nak, Internet mang nak, ca teng nak, teih püi gui-awn ng’khawt ng’gei nak gui-ung k’bä nak gui cuh ak’da hlü ci. M’hting nak k’bäi nak tuamt bi lo-ung i kia hlieh cin-ah bi loh-ah mong cuh ng’khai hleih m’thein tu gui vai hlü ci.

        A mi kho kum-ah ci-ah ma mong peit gui vai.

Ami mät-ah kho kum-ah ci-ah k’chü chah nak ami bi hnging vai-ah hla tha nak peit gui vai. Ami mät noh ghü k’ceng neh ami bi loh nak-ung kat nak ami bi-ah akia-ung ami mät noh ami m’cha m’lang hnging vai-ah m’thei m’thang gui vai.

        A k’hmo-ah bi loh nak hnging gui pyein m’sheit vai-ah tah om k’ih k’ni bäng m’thei gui vai.

Tu k’ngoi na na bi vai-ah ca gui kä na bi pha ca mo. Ngong i-ah na ci khai-ang ci neh ng’thu püi gui vai.

       A hngei k’hmo gui-awn kä m’täng vai.

A hngei k’hmo gui-awn m’täng neh pyein nak gui cuh ami mät noh ami mät ami ng’ngaih gep nak cuh m’di neh ami nu pa-ah k’khan-ah phih ng’u ng’sheih nak gui om lo hnging ca kia ci. A hngei k’hmo gui-awn kä m’täng-ein gui neh ami mät cuh ayan ka lah tu bäih ami ng’yäk ng’chan lo cuh teng gui neh k’tha peit gui vai.  Shin gui cuh ma neh ni m’thein tu gui hlü nei.

M’dün lo ba vai…………………..