Pyein Päng ä Ci-ah K’hmo
Pyein päng-am ä ci neh phan päng kä dam neh bi ci-ah k’hmo ami hnguh lo-ung ka hta lei ng’khai ci ci neh ng’ngai ca nu pa gui cuh da ca kia ci.
Cunte nang mi näu pa gui cun-ah hlo-ah k’hmo-ah hngu-ah nu pa gui noh kä mi hmat tu-ah ami ng’ä nak gui ng’thup neh om hti ca kia ci. K’hmo noh a k’cang-ah yum neh a do lah ka cun-ang ka dam lo-ung ka nu pa noh na k’she lo na khai ci neh ng’ä neh a ngüm-ang? Ka nu pa noh kä na yei lo na ba vai hleih ci neh ng’ä nak gui-awn a do-ang ci cuh hamt vai hlü lo ci. Mät-ah yum, ng’ngaih kä läk-ah ami na yei nak vai bäng ng’ya hlü neh om pe gui thei ca k’hmo cuh a ng’vai lo-ung m ät noh mät ääp nak gui cuh kyen neh m’lung-ah ui eng güh go nak gui cuh a k’da pi bui awt hnging ci gui-ah kia ci.
Ngami gui-ah ak’cum-ah ami ngüm ca ami ng’khai hlü-ah kä kia lo ba neh gen vai-ah ami kyüh, kä yei nak gui vai ami ng’ä nak, kä üüp äi nak gui-awn phih kia hnging ci.
Cun-ah kia hleih mikmi nu pa gui noh mi hta k’hmo noh i kia hleih a k’cum-ah ang’nän ana peit gui cuh mi ng’ngaih nak peit thei, m’hngi nak-awn mi teng tu peit hnging vai hlü ci.
K’hmo tumat noh phan-ung kää a ci lo-ung kä m’lung k’se-ein cang neh tah ani-ah am’lung k’kyong ang’ngaih gui a bü nak gui cuh hmat vai-ah pyein hlak neh ng’ngaih tu peit vai.
Nu pa gui-aw mi hta k’hmo-ah m’lung ng’ngaih i hlo ca kia ci cuh mi ng’ngai ät neh mi hta k’hmo gui ami m’lung üp hleih ami teih püi gui hngu-ah ng’cawih tu neh k’chang k’ni k’chang man gui-ah ami ng’vai lo vai-ah ami m’lung kyong-ah ka pyein hlak gui neh mi ng’ngaih tu peit gui kum u.
