K’kyong Khui Mah-ah Kya Vai Kyüh Nak
Ng’chu ng’la neh k’kyong khui mah-ah kia vai cuh kyüh vai-ah kä kia ci. K’kyong khui mah-ah kia vai cuh K’khanpughü noh a chü-ah ma mong tumat-ah kia ci.
Chit-ah ci-ah kho m’dek khan yumtu ng’bum k’hmo k’tho gui cuh ng’chu ng’la neh hta k’hmo mah-ah ami kya vai cuh kyü lo u neh k’hmo hta gui ami ng’tüi lo tu cun phih kyen lo ca kia ci.
A caw kia hleih Papa Shangpughang noh yumtu ng’bum k’hmo k’tho gui cuh thä hl aba gui neh, sih tuh chü k’hmo k’tho gui cuh kho k’chang ng’bum-ung vuuk kat nak gui da lo hleih k’hmo k’tho gui cuh ami ng’khah vai ng’shot ng’phyat u neh ami hta nav ai phih ng’gün lo ci gui-ah kia ci.
Cun-ah mong gui leih cuh hlum lei gah tang nak gui ang’hteik lo, ma mong kä htek nak gui, thum gui ang’hlah lo ni gui-ah phäh-ah kia ci. Cun-ah thum gui ang’hlah lo nak-ung mät-ah hla tha nak vai bäng teng lo nak, kho k’sho ka vai k’chü khän nak gui kyüh nak gui phih ng’dawn ca kia ci.)
Khanpughü-ah ma-ah ng’phyun neh ng’khah cuh thum k’phyüm-ah ami ng’ngaih lo nak gui phih om hleih kia ci.
Catholic yumtu ng’bum-ah yum nak cuh Catholic yumtu ng’bum-ah phäh-ah k’kyong khui cuh k’chang k’hli-awn om nak thei-ah a ng’yung-ah kia ci ci neh m’thei m’thang ci-ah kia ci. Khanpughü noh a pyan-ah k’kyong khui lah hta k’hmo gui cuh nib ä nak khap shoi tu-ah kia hleih papa Shnagpughang gui noh phih k’tha pe ci gui-ah kia ci. Papa Shangpughang Francis noh Khanpughü-ah ng’phyun neh ami ng’chu ng’la vai lah kho k’sho ka vai ng’gum vai kä mi kyüh-ein vai-ah k’tha pe gui ci. Cun-ah hlo-ah Papa Shangpughang Leo (14) noh phih k’hmo k’tho gui-am k’tha pe tu ba gui ca kia ci.
Papa Shangpughang noh k’hmo k’tho gui-am ami hla tha nak lah thing ling chüi kha ca ghün om nak ami shui lei hnging vai-ah lam m’shüm gui ca kia ci. K’kyong khui mah neh hta na neh om cuh k’chang pa khui m’düng ba bäng-ah kä kia neh mät mät-ah yei kyai nak lah Khanpughü-awn ng’et lo nak pi-ah phih kia ci ci neh yum ci-ah kia ci. K’kyong khui mah neh hta na neh om cuh dim kyäp nak cuh k’kyong khui-ung tün ca kia hleih dim kyäp nak cun phih tün neh pyan tham tu-ah kia ci.
