K’hmo K’se K’dam Nak Vai tah M’hloi Vai
Nu Pa gui-aw mi hta k’hmo gui mi k’hlut gen gui vai-am tah “a yä kä k’se nak ähngün te vai hlü ”ci neh mi ng’yu ba hti ci-ah kia ci. Kei nu pa k’ni-ah kä kia ci ci neh mi ng’ngai ba hti ca kia ci.
A k’cang lei-ah mikmi mi k’hmo-ah-ung ami na k’se k’dam nak gui man te gui cuh mi m’lung k’kyong-ah om neh acun gui-awn mi ng’vai lo neh can mät cuh mi thung tu na püi ca kia ci. Cun cuh (inner Child Trauma) ci neh chü ci gui-ah kia ci.
M’hting nak ci cuh mi hta k’hmo gui bäng mi m’thei m’thang gui ca kä kia neh mi mät noh mi mät cun phih mi m’hting ba hti ca kia ci. Pyien hlü cuh mi hta gui bäng mi m’hting ca kä kia neh mi k’hmo yah-ung mi kia man gui cun phih mi m’hting ba hti ca kia ci.
Mi hta k’hmo gui mi k’se k’dam nak-ung ngami-ah lu k’chawk-ung vuuk nak om ci ci neh ng’ngai ng’tang neh mi pyein gui phung cuh i phih kä ng’ya ba ci gui-ah kia ci.
Cun-ah kia hleih mi k’se nak, mi hlut gui vai-ah tah m’hloi gui neh k’hmo gui-ah lu k’chawk-ung üp äi nak om ci neh ng’ngai neh pyein a ng’yaak lo vai phäh mi m’thei m’thang tu gui vai hlü lo ci.
A shäng Ng’düm vai
Hta k’hmo ng’li lo vai-ah-ung ashäng mät noh mät ng’düm neh k’thum vai hlok phawk neh ng’ghü vai.
A k’hmo ng’eh neh beit kä ng’yak lo-ung “kä i i-ah kä kyah vai ci neh pyein nak gui vai-ah tah ka hta-aw na thüi khai ka hmat ci. Kei phih kä yei hman ci ”ci neh mi ng’hta püi gui vai.
Pyein-ah a mi om vai-ah tah ghü hlak gui vai.
Vai hlü-ah tu k’bäih tui ng’shi-ä ci-ah k’dam hngeng shäng shäng na ng’shi khai-ang ci neh amät-am ng’ghü hlak vai. A mät-ah yum-ah yum-ah a ghü-ah akia-ung alä vai cuh yä tu ba ci. A k’hmo noh tumat ku ku a ei hlü-ung kä ei vai ci-ah tah cun yah-ung na ei vai, cun ang’päng kon-ah na ei vai ci gui neh m’hting vai.
Mät-ah hta k’hmo gui noh beit ami na ng’yak lo vai-ah mät noh mät m’pyang ma neh tah hta k’hmo gui noh na kyüh neh pyein ami ng’ngaih ya tah na yei na neh ami na ng’ngaih lo vai ng’yaak hlü-ung mät noh mät ma neh m’lung pyan ma vai hlü ci.
