Ng’chu Ng’la Goi-ah Om Ih Vai Chin Gui

K’kyong Khui tumat-ung cuh k’chu lah cei ci neh k’hngih k’chang shing goi cuh tumat vai hlü-ah om ci goi-ah kia ci. Cun-ah k’kyong khui cuh avan a ge-ah ng’hloi ng’hlak bäng bäng ci ci cuh kä om hnging khai-ah kia ci.

Kä ng’hloi nak gui, vuuk kat nak gui, m’lung-ah bawng bai nak gui cuh hnging-ah kia ci. Cun-ah hnguh lo-ung mät bäng noh m’lung k’kyong-ah k’üüp neh cuun cuh dim kyäp ci vai hlü-ah kia tu lang pang neh phih a sho lo-ung m’lung mät cuh m’shih na ba hnging ng’chüih ca kia ci. Ka ni m’hngi aih ci ci neh ng’khah lo te goi cuh tumat noh tumat a m’lung thüi khai-ah ka om na man ni-ang? Ci cuh ng’ngaih nak ba vai hlü ci.

K’kyong khui mah k’hngumi am’shah cuh kä yum nak gui, kä yei nak gui a oom lo-ung kä ng’hta ba neh, kä ei aw tu ba ät neh va king vü ci gui phih om ci. Cun-ah k’kyong khui-ung om kya nak gui cuh mät-ah k’kyong khui cuh düm hta-ah m’shih vai-ah pong püi-ah kia ci. Ka m’lung a sheit hmat hlä ci neh akya cuh cang te ci. Cung phih cun gui cuh a cei hta-ah m’lung cuh ak’duk dei nak-ah kia ci. Kä ei tu ba, kä ng’hta tu ba-ah om kya nak gui cuh kyong khui-ah dim kyäp nak cuh kyäp kyäp-ah m’di k’hmaih-awn täng ci.

K’kyong khui mah k’pami gui cuh k’pung-ah ami pum kyä bawng bai hleih bi lo u neh, vuuk nak gui ami bui awt lo-ung im-ah ami gok lo ba-ung m’hngi nak ng’gei nak om hleih ng’düm tu hlü ci gui. Im-ah gok ba-ung phih yei nak kä om lo hti-ah akia lo-ung cun-ah k’pami cuh abi ng’päng lo-ung phih im-ah a hteh ba vai cuh ng’gin lo ci.

M’lung cuh se khai, thüi khai, yei khai, ng’ä khai. Cun gui cuh ng’chu ng’la goi noh nii na neh ng’lung na neh nai k’kyong khui-ah ma lam täng ka vai cuh ni lo pi hti neh bä lo pi hti khai-ah ng’lung ng’lak na neh ng’gei ng’cam hnging vai-ah k’tha na vä ci neh k’hnga ni k’phlang tu ba gui hlü nei.