Pâhtâ mòòng ng’htàngkònak
Tuhkbäih cuh Boi Jesu Kkhânpùghí ah kä yum ci gui noh shih nak ung ka noh kä ghìng lo ba ciah thùvì thêileh neh ami pyein gui lah tàkò gui ng’thêi neh a gah tu ah ami hle hlak gui yum tu ci gui noh ami ngshikca gui mi teng ba shüm ko.
Ma neh Boi Jesu a ghin lo ba kä yum ci gui ah Muslim mshah noh a hlê cuh Boi Jesu ah a gók cuh Pakistan Ghunkhò ung om ci ciah ami hlê ah kya ci.
Acun ah ami hlê cuh ashäng düt ka vai ah ami hle ah kya ci. Boi Jesu kä pyein ah A Nú Maria hngô a kyä lah a mchà kkhânmòpí ah a hngang kai on Boi Jesu shi netah a ghin lo ba cuh ngdáng ca kya ci.
Cun kon ah Boi Jesu yum neh akní ah läk ci gui cuh ami ghin yah ung Boi Jesu ah ng’ming on tàkò a hlü a hngäi ami mdáng cuh teng ung Boi Jesu cuh Khânpughi ah hmat phya ca kya ci.
Cun kon ah acun ah a hngú läk ca kcháng gui cuh ami ghin yah bäng ung kä kya neh ami shih kon hngo ah tákò a hlü hlü mdáng ci gui ah kya ci.
Cun gui cuh Boi Jesu noh a ghin yah ung a pyein tu gé ah kya ci.”Kei na yum ci cuh kä shi khai. A shih ung phih ghìng lo ba khai.Kei cuh lam ah ka kya ci.Hngun ah phih kä kya ci.Akcàng lüng ah phih ka kya ci.”
Shin ah hlo ah kchî gui cuh a u kchang gui noh phih kä pyein man ci gui.Boi Jesu bäng noh vah pyein hnging neh a pyein ah hlo ah phih om hnging ca kya ci.
Cun kon ah Budha gui noh Boi Kesu kä mi yum en tu vai ah hle hlak nak tumat om ba ci.
Cun läi cuh Boi Jesu noh a gah ah tako cuh Budha Phungki ah a ng’thei tu ci neh hle u chütah akda noh akcàng ah ng’ngai ci gui.
Cun ah hle hlak nak cuh i kä hmat ci gui no vah ami yum ah kya ci.
Hmat ci gui ah phäh ah akya ah gaih vai ah kya ci.A i ah kya hleih ci ung hteit neh a ng’thei nak tu ah ami pyein ah Tibet Khò ah Budha cuh Boi Jesu a ng’tüi kon ah AD 600 hlok ung vah Budha yumnak gok ca kya ci.
Boi Jesu a ng’tüi kon ah AD 33 ung shih netah ghìng lo ba ci noh noh AD 600 ung hteit neh a ngthei tu cuh akgù ah kchi ah vah kya lo ci.
Akcàng pyein ah akya ung pahta yum nak gui ung Boi Jesu cuh a u on kä täng neh chà tu hngá chütah avan noh ami yum lo vai kyi ci gui noh ami hle ah vah kya ci.
Cun bäng ah kä kya neh u on kä täng en ca Boi Jesu m’hle hnging ung ng’ming a tháng lo vai ami ngyak hlü ah phäh ah kya ci.
Cun gui avan pyein ung cuh khò knget ah biloh gui ah kya ci.
Shin ah amòòng alam gui cuh Budha ah mòòng akní ah hmat netah RC yum nak na ngshi ca Pughi Ngthang Kho Gei am ka mthein tu ba gui ah kya ci.
Acun gui akni ah mthein tu ba ung hleih shin ah u noh kä na mthein tu man te ci.Na bä ni ci hleih ka ni ngpai ba ci.
