M’lung k’she yäk Ca Nu Pa Gui-ung Gok Lo Hnging Ca Kat Nak Gui
Na pa päng cuh ak’hngät m’lung k’she hloi, m’lung än hloi ca kia ci. Nu pa gui cuh m’lung-ah bawng bai nak, kyä-ah nat nak, yai ca bawng bai nak nak gui cuh hnguh ling vai-ah kia ci. Cunte im k’kyong-ah m’lung k’de hlo hliik ca ak’hngüp täi-ah akya lo-ung hta k’hmo gui-ah m’lung ngaih k’tha lam täng lah ng’khot ng’gei tu thei nak gui cuh m’di hnging ca kia ci.
- Ami m’lung ngaih gui cang khai-ah kä m’dang lo nak
M’lung k’se k’hma ca nu pa gui-ung ka ng’vai lo ca k’hmo gui cuh ami mät noh ami mät cang hleih kä m’dang hnging ci gui-ah kia ci. Am’shah cuh k’düm hta k’hma-ah om u neh kyü neh ng’aa u neh, am’shah cuh ak’hngip kyäp-ah ng’thu ng’hta ng’khu ng’hlan nak gui cuh kä ng’thei tu man u neh ami m’lung k’kyong-ah om ci gui kyek khai-ah k’plok hnging ci gui-ah kia ci.
- Ng’thei ng’tham nak-ung k’tha a kyen lo nak
Am’lung kyong hnging neh güh ca k’hmo cuh kyong ca ang’thei nak tu-ung phih k’tha cuh cuh kyen lo hnging ca kia ci. Kyüh kyok nak, m’lung kyong-ah thet thong nak gui cuh k’hmo-ah k’chawk-ah shüm nak ba hnging gui lah m’hteih neh teng m’kyen ng’thei ng’thang nak hnging gui cuh m’di hnging ca kia ci.
- Mät noh mät yum nak a maih nak
K’pam cai k’aw m’lei nak gui lah m’lung k’she nak gui noh k’hmo hta gui cuh ami mät noh ami mät cuh kä ng’ngaih gep na hlak ci gui-ah kia ci. Ng’thu ng’hta vai, ng’thu ng’shi vai, ma mong k’thai gui ng’thei ng’tham nak tu hnging nak gui lah po teih püi gui-awn täng täng neh ng’thu ng’hta nak tu vai gui phäh kyü neh ng’aa lo khai-ah kia ci.
- Nu pa thüi nak (or) m’neh nak
Am’shah k’hmo hta gui cuh ami nu pa am’ci vit-ah thüi na neh ng’vai lo ci gui phih om ci gui. K’hngüp asho lo-ung asho lo-ah ci-ah ng’khawt ng’gei nak m’hngi nak gui-ah tah ng’u ng’sheih nak lah ceng nak gui-awn be lo hnging ca kia ci.
- M’lung-ah gai gong nak a maih hnging nak
M’lung k’se ng’plah ng’tang aih ca hngün-ung om ca k’chang cuh ak’hmo-ah bäng-ung kä kia neh ang’vai lo-ung phih ng’ä thei aih ca m’lung go nak ( Anxiety disorders) lah a hngei m’lung-awn ng’pak ca go pai nak gui phih hnguh hnging ca kia ci.
Caw kia hleih mi hta k’hmo gui cuh mi htei gui vai lah mi m’lung k’se-ung phih ng’plah ng’tang nawm pang nak k’hma gui cuh a chin hta dät-ah mi k’plok thei vai-ah mi k’tha na kom u.
