St. Joseph Mamah ng’thai m’hlüm tai nak.

St. Joseph mamah ng’tawi ung om neh hlui-bok gah tu ciah Mamah Elizabeth Ling Thung Awi m’hlüm tai nak cuh July k’cha 21st nak ung St. Anthony parish, Hilong ung bi ci gui ah kya ci. Mindat k’taigü Mang Augutine Thang Zawn Hung noh khong mang hleih Bawiphaya gui k’ko on a täng a Missa gän ap nak cuh bi ci gui ah kya ci. A cun ah Maamah k’thai kavai Khanpughi m’tam nak ung Mindat k’taigü Mang Augustine noh a pyein cu, ” A k’thai ah kya neh hlui phih bok ci, a sho lo ung ng’ai lo ho khai. Cun tu pang a phih Khanpughi ah bi bi nak ung m’lung cuh bok khai mi k’tha nak vai, mi hlui nak sho lo hleih mi hlui a ng’ai lo ung phih, Khanpughi a maa ah bok neh mi om vai cuh hlü ci ah kya ci,” ci neh na m’cäi gui ci. Khanpughi m’tam nak Missa ng’pyi päng lo hleih, Maamah Elizabeth Ling Thung Awi m’hlüm tai nak cuh ng’taih neh bi ci gui. A cun a bi nak cung k’hmo tho gui ah ng’äi nak lah khohtang khoih hngah nak cuh pek ci gui. A cun ung maamah noh Khanpughi ung ka noh leng neh, NuPa, phäina gui lah maamah a gah nak tu vai ung gung thot tu ci gui avan cuh shüm hmat nak gui ci.