Hta K’hmo Gui M’thüi Gui Hnging Nak Gui
Christian gui m’cäi nak cuh ng’thu k’ni-ung om ci. “Na Hta k’hngu hta k’pa thüi hlei neh am’lung she khai-ah kä na ci vai” ci neh om ci. I-ah hlo gui noh hta k’hmo gui cuh m’thüi m’hlei hnging gui ci-ang ci lo-ung
- Ng’daw ng’peit vai hlü-ah m’hngi nak m’dang
Ci k’cha nak ci hnging-ung vah ka ning yei nak khai, beit nak ng’yak-ung vah ka naing yei nak khai, na ng’khai-ung vah cun ka ning k’hleih pe khai, cun na gah khai, ci gui-ah ng’daw ng’peit vai hlü-ah m’hngi nak gui m’dang nak gui cuh nu pa gui-ah m’hngi yei nak gui cuh ak’be-ah kä gah neh peit-ah ci-ah vah gah ba ci neh ng’ngai lo ne nu pa gui-ah m’hngi nak-ah k’khan-ah ng’ngaih ng’shak lo hnging ci.
- Hta k’hmo gui m’cha neh yei nak
Ng’vai tu ba ci m’hngi pi-ah ng’khaw, k’hmo tu ba yei nak pi-ah mäih gui,i-ah bawh tumat ku ku ami kya lo-ung hmai yuun neh m’cha neh gen k’she nak gui a om-ah kia-ung ng’htäit lo ca hta k’hmo noh anu pa cuh m’lung k’uih eng lo na hnging ci.
- Pyein a hngei bi a vang-ah kya
Hta k’k’hngu hta k’pa gui-ah hngu-ah om k’ni kä m’dang neh “ka pyein-ah na mi bi vai, ka bi-ah hlo-ah kä na mi bi tu vai” ci neh m’cäi nak gui. Hta k’hmo gui ami hting ling vai k’kyep gui cheng geng neh tah mät ge a long hngei-ah om ih nak gui cuh hta k’hmo gui noh ami nu pa gui ami m’lung k’kyong-ah thüi nak hnging ci gui-ah kia ci.
- A hngei k’hmo teih püi gui-awn m’täng nak gui.
Im ng’gü lo ng’phei-ah ka a hngei k’hmo hta gui-awn m’täng neh, ngami tah cun-ah bä ci gui, cun-ah ng’khai ci gui ci neh mät-ah hta mät ge m’shuk k’chaak neh m’täng nak gui cuh tha k’hmo noh a nu pa cuh m’lung k’ui na hnging ca kia ci.
Ng’thu k’ni-ung
Nu pa gui-aw nami hta k’hmo gui ami m’lung thüi hlei khai-ah kä na mi ci-ein vai nei. Khanpughü-ah ng’yak hlü-ah be m’cäi, m’thei m’thang neh ami tu m’htah gui vai nei. Ci-ah om ci.
