Hta K’hmo Gui M’thüi Gui Hnging Nak Gui
Christian gui m’cäi nak cuh ng’thu k’ni-ung om ci. “Na Hta k’hngu hta k’pa thüi hlei neh am’lung she khai-ah kä na ci vai” ci neh om ci. I-ah hlo gui noh hta k’hmo gui cuh m’thüi m’hlei hnging gui ci-ang ci lo-ung
- M’ghuih The nak gui Aih
Ami ng’khai tu vai, ami hting’ling tu vai ng’ya hlü neh m’ghih teh nak gui cuh bäi neh, m’uum neh ng’phling neh kia khai-ah m’ghuih teh nak gui cuh hta k’hmo gui noh ami nu pa cuh ngai-ah chüt thüi na hnging ci gui-ah kia ci.
2.K’chü m’gong-awn m’kat gui Nak
Nu pa gui noh hta k’hmo gui cuh beit m’cäi vai chin tu lang hleih phih beit m’cäi lo-ung I-ah kä hngu tu neh yo na neh, m’shuk k’chaak neh käng ng’hta püi vai. Ngoi-ah a nu pa cuh thüi na m’ci vit hnging ca kia ci.
3.A guih-ah kä tä-ah Nong Nak Gui
Hta k’hmo gui-ah ng’yak hlü gui hmat lang neh a guih-ah kä tä-ah nak nong nak gui, ami m’lung ng’ngaih gui hmat lang neh kä tä kä ng’ngaih peit nak gui, ami pyein tu hlü gui k’bäi neh khai peit nak gui cuh hta k’hmo gui-ah m’lung k’kyong-ah ka nu pa noh kei kä na m’hngi ci, kä na yei nak ci ci-ah ng’ngaih nak gui cuh om lo hnging ci-ah kia ci.
- Ng’ngaih ng’shak nak gui
Hta k’hmo gui-ah khan-ah ng’ngaih ang’shak nak gui, hnguh ang’shak nak gui-ah ka tu ba ci cuh ng’ngaih ng’shak nak-ah hmat lang neh nu pa gui noh ami kat nak om ca mong cuh ami k’däih nak gui cuh hta k’hmo gui-ah phäh-ah m’lung thüi neh m’lung k’tha kyen hlak ca kia ci.
- Kä chin hleih k’bäi nak, shan nak gui
Kä chin hleih k’bäi neh hting ling hlak gui neh shin na i-ah akya-ung phih na bi hnging khai, na bi vai ci gui neh täk gui neh tah kä mi m’chüt lo-ung gen k’she tuk thah nak gui, ami mät-ah m’hngi-ah kä ghüng om-en neh ami nu pa gui-ah yum bäng läk neh ami om vai-ah ling gai neh k’kyep gui cuh k’hmo gui-ah phäh ami nu pa cuh thüi nak hnging ci gui-ah kia ci.
Shin gui cuh hta k’hmo gui noh ami nu pa gui thüi na hnging ci-ah mong gui-ah kia ci.
