K’hmo M’thei Nak
Hta k’hmo cuh ngo ng’düi lo thei neh ei lo thei neh a kya lo-ung ni k’se kä m’kho m’cha thei pha k’ca kia hleih a nu noh m’thei ca kia ci.
Cun-ah hmo cuh a nu noh am’thei m’thang-ah ni ci gui cuh kä bi hlü neh amät-ah bi hlü gui cuh tün neh bi lo hlü ci.
Kä hteh vai, kä bi vai aci gui päng cuh k’hlet neh amäta-h kia hlü päng gui cuh kyap neh m’hlo lo thei ci. K’hmo päng cuh amät-ah bi hlü gui bäng cuh hmat ci gui. Cunte ni k’se kä m’kho m’cha thei pha ci gui. Cun-ah hlo-ah ka bi hlü ka bi khai, ka ng’yak hlü ka gah vai-ah ka bi khai ci-ah m’lung ng’ngaih gui cuh shih güt chüt hleih kop lo ci.cun-ah hlo-ah hamt gui kä bi, bi hlü bäng bi nak gui cuh om lo ci. Kä hamt cuh hmat vai-ah kä bi neh om nak gui cuh da lo ci.
Mi mät noh mi mät mi ng’ngah tüh ba shüm ko. Nu pa-ah hmai ak’kyang vai-ah mi om ip man ne-ang?. kä cunh-ung mi m’thüi m’hlei man ne-ang?
Kä bi chin hloi cuh Nu Pa Shüm Hmat Nak-ah Kia Ci
Nu pa gui-ah m’hngi yei nak cuh Myintmo m’htung hlok-ah däm ci ci neh m’tam ci gui.
Vawh se, gang k’se cuh ghawh man. Hta k’hmo k’se ghawh gui kä ghawh hnging cuh nu pa gui-ah m’hngi nak-ah kia ci.
A m’shah nu pa gui lei noh beit kä ng’ya neh kä k’bü-ah om ca ami hta k’hmo gui cuh im-ung ka noh hlot ci gui phih mi ng’ya tu mat ci-ah kia ci. Cun gui cuh kä loi-ah kia ci.
A shah k’chang gui noh ami nu pa-ah ni bä nak gui shüm hmat tu ba hlü neh hlü neh kä ni k’ca bi loh ma mong gui cuh bi gui-ah kia ci. Cun cuh bü ceng nak cuh ni tu pang neh phih man nak-ah lam cuh ng’chei ca kia ci.
Bi chin gui bi cuh Nu Pa Shüm Hmat Nak-ah Kia Ci
Nu pa gui-ah m’lung ng’ngaih cuh däm ci-ah kia ci. Kho k’hlo, kho k’aa kä hamt-ah hta k’hmo gui ka vai-ah ami bi loh k’tha nak cuh ngami noh yei tu vai tumat düt-ah ng’ngai ci gui. Cun gui cuh k’hmo yah-ung kä hmat-ah kia neh ng’yak hlü gui cuh nu pa-ung aom kä om kä hmat neh mi ng’shang hti ca kia ci.
A m’shah noh ngui ghui khoh tang gui nu pa-am peit cuh nu pa-ah ni bä nak shüm hmat nak ci neh ng’ngai ci gui. Cun phih ni ca mo. Ng’khai ng’lang hngu hmat thei neh thing ling chüi kha neh om ih thei cuh nu pa-ah ni bä nak shüm hmat nak-ah kia ci. Nu pa gui-ah phäh-ah mät-ah hmat-ah tah hlüng tu ba hleih, da tu ba hleih hmat khai-ah ng’thei ng’thang tu hlak, mät-ah kä hmat tu gui hngu hmat tu khai gui-ah phüih tüng gui cuh nu pa-ah ng’khän nak-ah kia ci
