K’Kyong khui Mah

K’Kyong khui mah ci cuh hlum lei aung pan-awn kä täng tu ca kia ci. K’chang päng cuh shi hla mah-ah kia ci.

              Kho kum (18) gok lo ca hmo k’tho gui cuh k’chang k’hli hngu-ah ng’dang ng’ya neh kä kya hlü ci gui. A cun yah-ung ami m’lung cuh m’hngi nak yei nak-awn be neh po teih püi-ah ng’khot vai, yei kyai vai, teih püi gui ng’ya hlü ca m’lung gui cuh be ci.

             Kyawm ci  yum nak k’hngumi k’pami gui van-ah om-ah kya neh tumat noh tumat yum nak ngak nak gui cuh ng’tüi lo neh po tha nak gui, ng’yum m’hngi nak gui cuh om lo ci.

            Cun-ung leng ci cuh k’kyong khui mah-ah kia lo nak om lo neh ng’khah thai yah-ung lei cuh ng’yum m’hngi nak gui-awn be te ci. Kho kum a sho lo-ah ci-ah ng’yum m’hngi nak gui cuh ng’pai lo hnging ca kia ci. A k’hmaw tumat k’hngih bäng a om yah-ung m’hngi nak ng’gei nak cuh om yah ci. Ni hleih käng hmat pha ci. A k’hmaw k’thum k’phli a lo lo-ung kyawm hleih yumte-ah müi hmai cuh ayaan ka hlo-ah kä kyawm htang lo ba hleih m’hngi nak gui cun phih ng’pai lo hnging ca kia ci. K’kyong khui mah-ah kia lo kon-ah kyawm htang vai-ah ng’bi ng’loh vai pyein kom hmai m’hla vai hngo yah k’kyong khui mah k’hngumi gui cuh kä ng’bün lo ba ci gui. Hmai m’hla, lu k’thuh, tui ng’shi vai gui cuh kä ci lo ba hnging u neh ami k’kyawng khui ka vai yah tawt lo neh kya lo ci gui. A m’shah lei cuh cei hta mah kon-ah ng’bi ng’loh vai kä hlü ba ci ci neh pyein ci gui phih om ci gui. Kyawm hleih yum te. Kä kyawm lo ba hleih kä yum lo nak ba gui cun phih om hnging ca kia ci.  Kyawm hleih yum-ah tah ak’cang-ah ng’yum m’hngi nak-awn khäng hleih m’htek neh ng’khah vai cuh hlü lo ca kia ci.