K’hmo Gui Noh Nu Pa-ah K’chü Mi Ng’ngaih Vai-ah
Nu pa gui lah hta k’hmo gui a nep-ah ng’hta ng’ko cuh ni ng’khawt ng’gei nak vai-ah mong tumat-ah kia ci. Ngami-ah k’khan-ah ng’ngaih nak peit gui, m’hngi nak gui cuh cun phih m’dang hnging-ah kia ci. Vuuk kat m’cha nak lah üp äi nak gui cun phih m’dang hnging-ah kia ci. K’hmo hta gui-ah phäh k’hnga k’phlang gui lah ak’khak-ah ng’ngaih nak gui cun phih nupa gui noh pe hnging ci gui-ah kia ci. Cung phih kho kum 10 kah 14-ah ng’lak kho kum nak ca k’hmo hta gui-awn ng’hta vai cuh kä ng’hloi ca kia ci. Ngami gui m’kat neh ng’hta püi gui-ah ami ng’ngaih lo-ah kia-ung m’shang lo tu ba hlit hlit ci gui. Ngami gui-awn ng’hta ng’ko-ung ng’ngaih nak vai gui ak’da om ci.
- ang’hta-ah ng’thu cuh ak’ni-ah ng’ngaih peit vai.
Ca k’chei-ah akia-ung apyein lo-ah ng’thu cuh ca uk chah neh ng’ngaih peit vai. Video teng yah akia-ung ani täng-ah ng’hmai m’hlat neh ng’hta püi vai. A pyein gui cuh ng’phleh khai-ah ng’ngaih pe neh tah pyein tu ba vai.
- A pyein lah ahngün hngawk vai phih ng’ngaih peit vai.
A hmai teng neh mik goi ng’chum hleih teng neh apyein lah kä cun ng’ngaih nak vai. Ak’aw lah hngu ma ng’gui hleih a ng’hta lah kä cun phih ng’ngaih nak vai.
- K’hmo hta gui-am k’hnga k’phlang nak kä peit gui p
ha-ung (or) yum ät nak kä peit pha-ung ani-ah ng’ngaih hmat vai hlü ci.
A pyein gui kä na hmat lah na hmat ang’shing vai phäh-ah k’hlai neh na ng’shi ba vai.
- Ng’ngaih na neh k’hnga m’cun peit gui vai.
A ng’thu ng’hta-ah hngu-ah i gui tah om hnging ci ci gui cuh a pyein hlü lah ang’ngaih gui cuh hmat hnging vai phäh k’plok pe gui neh pyein hlak gui vai. A ng’ngaih na hmat pe ca k’hmo noh ang’ngaih kon-ah ani-ah mong cuh pyein lo pi hti khai.
