Chichester mânggo ung ka Bä ciah Richard ah ghünlu a mong
Bä ciah Richard cu a ni lah a Pa ng’dot ne shi ni hleih a ni ah ghünlu cu yaica buiawt nak awn leng ciah kya ci. Cun tu pang ah phih a ni cu kä cang ci gui k’khen hnging ne a m’chüt näng nak awn yum nak lam ung ghuih ne hngu hmat ciah a ng’vai tumat ah kya lo ci. A ni cu hnguh hmat nak ung ghuih ciah kya hleih Oxford tekkahto ung Saya tumat ah kya lo ne a ng’shün shun ah hlüngtai lo ciah kya ci. A ni cu a k’thum nak Shangpughang Henry ng’hngu ng’tuk püi ne yum tu ng’bum ghung ciah kya ci. Richard cu England ghunkho ah gok lo ba ne Chichester mânggo ah Taigü Mâng tumat ah kya lo ci. Shangpughang Henry no a ni cu kä do ne a ni ng’tam püi ciah k’chang tumat ah pyein ciah kya ci. Papa Shangpughang no Richard cu k’bäi ne kya hleih Shangpughang Henry no a cun kä yum lo ne Richard ung om ciah khotang gui a van cu ghunkho ah kho tang gui ah kya khai ah a ci yop ah kya ci ne ta ghunkho k’om gui a van a u no phih Taigü Mâng Richard kä mi do, kä mi m’om ein tu vai ah ca gu ne a peit gui ah kya ci. A cun ah kya hleih Richard cu a pa k’khui k’chang gui ah hngu ah k’chang hei vai hlü ah kya lo ci.
A ni cu Taigü Boi tumat awn a täng ah om ne a ni kho awn hteit hton ne Khanpughi ah mong lam thähla m’thei m’thang ci goi ah kya ci. Kho kum goi peng peng Shanpughi ghang no a ng’ngaih ah ci ne ta a k’hngu ah a m’lung k’nga ng’thong hlak lo ne läklam gui m’thong hlai pyang tham ba ne ta Richard am Taigü mâng ah a k’be ah kya ne a bi loh vai gui phih a bi hnging vai ah ci hleih a cun ung leng a k’ni ah bi bi hlot ciah kya ci. A ni cu k’chang gui ah k’khan ah a pyein vai a í phih kä m’yih m’thu ein ne pyein ne ta kat mah k’chang gui k’chü m’gein gui ciah kya ci. K’chang gui ah k’khan ah ng’khai ne a hlum lei nak gui ung phih aungtang khai ah bi thei ciah kya ci. Richard ah k’chang gui a k’dâ no a mi hmat tu ah ng’äi cu “Nang Boi bäng hti khai ah na hmat na hguh hlak ne ka ning m’hngi yei lo nak pihti vai ah na ci peit ä. A k’hngüp täi hleih nang Boi awn ng’et lo pi hti ne ka ning läk vai ah k’tha gui na pe ä” ci ne a k’taigü ah kya ci. Bä ciah Richard cu Christu kum 1253, April k’cha 3 ung a kya ah goi lo ne Dover mânggo ung shi ciah kya ci.
