Bä ciah Deogratias ah ghünlu a mong

Romah Emperor a dí cu k’chang k’she gui ah ghatghum ah phäh ah kya ci. Ngami gui ah ghatghum ne kalu tak nak gui cu Mediterranean tui nu hlun ne Africa hlîp lam ah chüt hleih Christian gui ah khong mang nak gui a mi m’dí ah kya ci. A ni cu AD 456 ung Carthage mânggo ah Taigü Mâng ah kya lo ci. A k’htük pi ah Deogratias no a cun ung om ciah Christian ah kya ci gui lah Christian ah kä kya ci gui a van cu k’tha na ne gunghtot gui ciah kya ci. A cun ah ci tu pang lang hleih phih khokum ät ah k’be ung a ni ngon khai gui ah pong lo ci gui ah kya ci. A ni cu yumtu ng’bum ah kyomhtang khai ah a mi pyantham gui lah a mi khohtang gui a van yoi ne k’chang k’ghatghum kalu tak ci gui ah Vandals gui ah khong mang k’chang gui ah kya ciah Genseric no Roma mânggo ung ka no hlîp Africa lam ah a mi yoih tuk ah k’phan k’chang gui cu ngui pe gui ne a mi m’hlot ba vai ah a ci ah kya ci. Deogratias cu a k’kyawng khui gui awn a täng ah a mi ät ba hnging vai ah phäh ah a kya ah k’tha na ne bi ciah kya ci.

A ni cu a om nak ah k’taigü kho ung om ciah a k’däm pi goi ah Pacilica ah kya ciah Fausti lah Novarum cu a mi om k’ih nak vai kä om hleih yaica buiawt ci gui ah om nak ah ng’thong hlat khai ah a ci ah kya ci. A ng’shong yah ung a k’goi gui ah om nak ah hteit ne ng’hta ng’ko püi gui , k’tha pe gui ne ngami ung hlü ci gui gunhtot gui ciah kya ci. Carthage mânggo ung om ci gui ah k’chang a k’dâ no a k’ten ah a ni ng’hngu ng’tuk püi ne kä yei lo na u hleih a cun ah mânggo ung khokum ät bäng va om ne ta a kya ah bi a bi nak awn bongbai lo ne Christu kum 457 ung a im ah hteit ba ne shih ciah kya ci. Taigü mâng Deogratias a shih kon ah kho kum 20 ah chüt hleih k’chang k’ghatghum gui no Carthage mânggo ung a hei Taigü mâng kä hteh ein ba vai ah ci ci gui ah kya ci.