Pum kyä A ng’thong Lo Nak

Kum gha phlän lo ca k’hmo hta gui cuh ami pum kyä ng’thong lo ci. Cun-ah ang’thong lo nak cuh ng’pyang mi lo ng’lami lo-ah ci-ah kya ci. Homone gui cun phih ng’thong lo neh ami dung kyä däm hla lo neh ng’shäi lo neh güh hnging lo ci gui. Hnguh hnging gui-ah ami ng’thong hlat nak bäng-ah kä kya hleih kyä kyong-ah ng’thong ng’hlah nak gui cun phih a k’khak om ci. Ami däm ng’shäi lo cuh ami k’hmo-ah-ung kyäp  kyäp-ah ng’thong tu lang hleih phih ng’pyangmi lo ng’lami lo neh ami kya lo-ung ng’khai neh ng’dang lo ca kia ci.

Ng’pyang lo ng’la lo yah cuh pum kyä däm da hleih ng’thong hlai ca kya neh ami kyä cun phih ahlo yang yang, ami om kya cun phih a hlok yak yak-ah kia ci gui. Kut gui kho gui cuh ma neh däm lo neh kut ng’lan, kho ng’lan gui cuh a k’hngu-ah hla lo ci. Ami k’hleng ng’kai lo neh ami kyä däm lo ci. Ami müi hmai phih ng’thong lo ci. K’pami hta gui-ah ng’thong ng’hlah nak cuh ng’hmat tu pi ci. Hngüp täi a täng-ah om-ah k’chang noh kä k’shing tu pang hleih phih a hmät hta hnguh tu ba hti ci noh ami müi hmai ang’thong lo cuh ng’khai hleih k’shing ca kia ci.

Ng’pyang lo ng’la lo-ung pum kyä ng’thong ng’hlat ci ci tu lang pang-ung phih kä täng hnging ca kia ci. Mät-ah shi hla, pa k’khui lah ei awk gui-awn phih ng’cha ca kia ci. K’hngumi hta gui cuh k’pami hta gui-ah ya tah ami kyä ang’thong cuh yang tu ba ca kia ci. Kho kum gha-ung ka noh tün neh ami kyä cuh ng’thong neh k’pami hta gui cuh kum gha lei ät-ung ka noh tün neh ng’thong lo ci. K’hngumi k’pami avan nah ng’thong nak a tün lo nak lei cuh kum gha lei ät-ah kia neh ak’sho pi lei cuh kum gha lei k’chuk-ah kia ci.

M’dün lo ba vai……….