Pâhtâ mòòng nghtàngkònak
Pâhtâ mòòng pyéin lo ah akya ung akdá pí noh amimät ah yùm gui,ami mät ah ngngaih gui pyéin shàn ci gui. Kchàng hei gui ah ami yùm ami hnguh ami ngngaih cuh má neh kä pyéin hlak ci gui. Acun cuh pahta mòòng hnguh hmat pyêin hla neh läk nak ung ngkyoh ngleh lo ca kya ci. Acun ah ngkyohngleh ci cuh má neh kä k’hlet netah pahta mòòng pyéin cuh kä chüt gok ca kya ci. Akní ah ng’äì lo te te netah akhngú ah a i ah phih kä nghmat neh pit lo düt hleih ng’äi chütah a ng’äí pám kyu ci ami ci on täng ci. Ahei on mtùmtäng neh pyéin ah akya ung khtìng kbèi tum on täng ci.Kbèi cuh mòòng nak akní ah tum chütah mshán nak noh tòi ca kya ci. Acun ah hlô ah akthum nak,akphlînak,akhmânak,akchuknak lah akchüih nak cuh angtäp ah lo ca kya ci. Acun gui on akní ah nggûi khai ah khtìng lah ngshé cun phih tum neh kchét ah kya ci.
Pâhtâ mòòng ci lo nak ung ahei khòmdek mòòng gui biloh on kä täng tu ci. Khòmdek mòòng gui ah akya ung kei ci neh mà neh hlüngtài hlü neh mlämkhâng neh línggái nak gui,ngcuhngcan nak gui on bé neh dìmkyäp yèikyài nak kèn ca kya ci. Avai hlü ah pyéin ah akya ung polúm ngtâm neh nglah nak ung a u lam ah phih ami ngnän vai bäng ngah-tüh ci gui. Khòkum 18 lah kkâ ah ka gui bäng nglah neh gah ci ami ci nak ung u noh kä hmat veih ah kchàng tumat kum 18 khê ci ngvat neh ami ciah phäh ah ani cuh akghuih ah a nglah ah phäh ah ngnäng ci gui. Ngnäng lo hlü ktat neh tah penalty pèi ah ami ci ton ah ngshéi hleih penalty on ngnäng ci gui. Acun ah hlô ah ahêi thùvì thêileh nak gui ahlü ahngäî on ami ngnäng vai ah lam shùi ci gui. Acun ah hlô ah lungkhò khoh kchàm ngcuh ngcannak gui ung kchàng gui cuh ami mät noh ami gah vai ah vüngvà thùvì ci gui.
Yùngkûng mâng k’hlák ah ami gok lo ung phih pyéinpit khai lah mchamlàng khai am yù lôi,êi shòng neh tumbêi neh ngùi ghùi khoh-tang on kdäk neh peta neh ci u hleih kä ngnäng khai hlü te phih ngnäng lo ci. Pâhtâ mòòng cuh acun ah khòmdek kchàng gui ah om kya ah hlô ah bä ngmang vai,mlämkhâng vai,nglä ngtâi vai phäh ah ng’uh ngtak nak,m’ùm mkyâp nak gui on bi tu neh kä gah ah kya ci. Mlùng m’yô mnêim neh akdìm akkyäp ah om nak,hlà yàng neh péitták khoih hngah nak,mä kä mà en neh kchàng hêi khmà nak hlü ciah mät noh mät phep neh khòmdek kchàng ngnéng gui on kä täng en hleih om nak on vah pâhtâ mòòng ongtang nak gah ah kya ci. Acun ah khòmdek kchàng ngnéng gui on kä täng en hleih dìmkyäp yèikyài nak on om ci gui cuh kä kchî kkyò tu pang láng u hleih phih,kä mlämkhâng thêk-hâi u hleih phih ani ah om mòòng ghinlù cuh kchànghêi gui ah mlùng khngà ung ghìng om lo ca kya ci.
Avai hlü ah Mother Theresa cuh Nobel Price phih gah neh akya ah a ngmìng a tháng lo cuh a om ih a biloh gui,kchàng a mhtéi mhtà gui ah phäh ah kya neh a kchíkkyô thêi,a tat-lah a hnguh hmat gui ah phäh ah kya ci. A biloh mshah gui mi teng shüm ko.Ani cuh kchàng a gung nak vai ngùi ghui khoh-tang i phih kä thà ci.A kut ung ngùi phé phih kä om ci. A mät ah êi ôk vai hngô kä om ci.Cun yah ung India Khò cuh ngmang ci gui cuh a kchûn ah ngmang u neh dú ci cuh dú aih netah có ghâ neh lam pèi,bung hngù,tui kkàm yung ah shi neh ngyán ci gui. Akkà pí cuh hlüngtài ca kchàng lah düm ca kchàng ah ngpâi u neh düm ca kchàng cuh u noh phih kchàng ah kä ngngai tu u hleih kpùng kphé neh cói ghâ gêin vai neh shi ci gui.A cun gui mhtéi khai cuh u phih kä om ci. Acòyah no phih kä bi hnging ci.
Acun ah nglùng ah ngùi phé phih kä thà ca Mother Theresa noh amät phih ngyòi neh èi neh ami nong ghoh ah kkhêilèi ah êi gui cuh Bói Jesu mät ah hngu gui neh mashîkpyò kuh màn neh a ci lo ah phäh ah India Khò bäng ah kä kya neh khòmdek púm van noh a hmat ah a ngmìng tháng lo ci. A cun cuh teng nak on pâhtâ mòòng nggè ngshòi nak ung läp läp ah pyéin ah tah mlùng kthéing on kyäp kyäp ah bi cuh shàlòng tu ba ci cuh mi hngu hnging ci.Acun ah kya hleih’Ingkalik noh”Actions speak louder than words”a pyéin ah kya ci.
