Bä ciah Christina Ciccarelli ah ghünlu a mòng

Bä ciah Christina cu Christu kum 1480, February k’cha 28 hngüp ung Italy ghunkho, Abruzzi mânggo ung ng’tüi ciah kya ci. K’kyawng khui ung ng’nu ng’be k’chuk ung ka a ni cu a k’shui pi ah kya ne a ng’ming cu Matthia ah kya ci. A k’hmo hta yah ung ka no a ni cu Cahtolic yum nak ung gok tu ciah kya ci. A ng’vai lo ah ci ah a ni cu k’taigü nak lah kat gui ah phäh ah ng’yu ba ne om vai ah Khanpughi no a chü ah kya ci ci-ne a m’lung kyong ah ngai ciah kya ci. A ni cu Aquila mânggo ung om ciah Bä ciah Augustine ah Boiphaya kyawng ung lut tu ne a cun ung ka no Christina ci-ah ng’ming awn Mamah tumat ah kya lo tu ci. Christina ah Mamah ah ghünlu cu ng’thup ne dìmkäp hleih phih Aquila mânggo ung om ciah k’chang gui no a ni ah ghün om nak vai ah a bi loh gui ah kyomhtan nak cu shui ne hnguh ci gui ah kya ci. Mamah Christina lah a hei Mamah gui cu k’taigü nak awn Aquila mânggo k’om gui ka vai ah a ni vai bi ci gui ah kya ci. Christina cu Boiphaya kyawng ung om tu lang pang ne phih a mät ah ng’tüi om nak ung ka duyai k’chang gui ah hlü ci gui cu hmat ciah kya hleih Mamah Christina lah a hei Mamah gui cu pyam ci gui gunghtot gui ne om ci gui ah kya ci.

Mamah Christina cu k’chang gui no a mi buiawt ah yaica geinvai nak gui cu hmat ciah kya hleih ngami gui ka vai ah k’taigü ne a mi bü ceng gui a mi gah vai ah Khanpughi ah ng’yu ba ne om ciah kya ci. Boi Yesu no Christina cu maalam ah kya lo khai gui a hmat nak hnging ah a k’ni vai cu a peit ah kya ci. Khanpughi no k’chang gui ah nibä nak vai ah phäh ah cäicat vai gui a bi nak ung Mamah Christina cu a mang ah kya ci. Boi Yesu ah Shi Hla(Corpus Chrsiti) poi hngüp ung Mamah Christina cu k’khan ah yong ne Host ung Boi Yesu ah müihmai a ng’khyan ung ka no k’khang ne pyhai ne lut lo ciah a mi hnguh ah kya ci. A ni cu Christu kum 1543, January k’cha 18, a khokum 78  ung shi hleih k’chang gui a k’daa cu Mamah Christina no a mânggo ung a peit ah letsawn ah phäh ah m’tam khai gui ah gok lo ci gui ah kya ci.