Khanhtapup Gui-ah Mong

Mi pei-ah yah gui-ah a hngei ai hli k’cha gui-ung-ah a hngun k’ghüng gui-ah mong gui cuh mi hnguh ng’yfak tu man hngo khai. Mikmi na om püi gui neh ak’cum-ah na m’htei gui khai-ah Khanpughü noh a tüih lo-ah kä hnguh gui hnging te tüi pyan tu gui kia ci gui cuh u ni-ang? Ngami cuh Khanhtpup gui-ah kia ci.

Khanpughü-ah phan ng’shä Khanhtapup gui cuh mik-awn kä hnguh hnging gui-ah  kia ci. Ngami gui cuh tüi pyan tu gui-ah kia neh ami om-ah mong cuh mi yum nak-awn mi hnugh hnging ca kia ci. Khanpughü mät-ah hlo-ah ngami cuh m’cha bäng-ah kia ci gui. Ngami cuh hnguh hmat nak hlüng neh pum kyä kä om ci gui-ah kia ci. Ngami cuh m’lung-ah m’yung-awn hngün tho neh bi lo ci gui-ah kia ci. A cun hlu-ah müi gup ami chet lo-ung ami ng’phya gui cuh ng’dawn khai-ah gup ci gui.

Müi gup gui lei-ung Khanhtapup gui cuh täng ci gui vai hlü-ah mi hnguh hnging te ci . Cung phih ngami cuh tumat lah tumat kä täng ci gui. Neta ng’bum phäh phäh-ah om ci gui. A ng’vai pi gui-ung Khanhtapup k’tai Cabriel cun phih tumat-ah kia tu ci. Khanhtapup a m’shah cuh a hngei gui-ah tah hu ham däm tu ba ci gui, hnguh hmat nak hlüng tu ba ci gui ci-ung phih khanhtapup gui avan cuh kho m’dek k’chang gui-ah tah lei hnguh hmat nak hlüng tu ba gui-ah kia ci.

Khanpughü noh ngami gui cuh tüi pyang gui ne tah cam gui ci. A m’shah cuh Khanpughü-ah phan-ah kä om ba vai neh ng’htät lo ci gui. Cun gui khong gui ci cuh Lucifer ci-ah kho k’nget k’tai-ah kia ci. Ngami cuh Khanmopi-ah ka noh ami k’tä gui-ah kia ci.

Khanhtapup ci cuh u-ang?

Khanhtapup ci cuh Khanpughü-ah bi loh gui-ah mong cuh kho m’dek k’om gui-am ng’thu shä ci-ah kia ci. Khanhtapup k’tai Cabriel cuh Khanpughü-ah nu-ah akia lo vai-ah Nu Maria-am ng’thu shä lo ca kia ci. Ng’thu k’phyüm-ung ghü lo neh kä hta tu ca Sara-am k’pa mi hta ahta vai mong m’thein lo ca Khanhtapup k’thum noh Abraham-am m’thein lo ci gui.

Ngami-ah bi loh am’shah cun phih ng’thu k’theing-ung mi hnguh hnging ca kia ci. Khanhtapup gui noh k’phyon ca Bawi a ng’tüi lo tu vai mong cuh hto k’shäm gui-am m’thein ci gui. Bawi Yeisu kho k’hngüp k’phli kyip ei hloi neh shuh a shan yah-ung kho k’nget noh tawk tap hmawng cang hleih Khanhtapup gui cuh Bawi Yeisu m’htei vai u neh kyum lo ci gui.

Kä ni ca Khanhtapup gui lah ni ca Khanhtapup gui cuh kho m’dek khan-ah püi neh yat ci gui. Kho k’nget-ah ng’shä gui cuh yei kyai nak-ah a ng’yung a khawng-ah kia ca Khanpughü-ung ka noh ng’cha vai-ah na k’phyu phyawk gui ci. Vang täng-ah Khanpughü noh a phan-ah Khanhtapup gui cuh mikmi na m’htei gui u neh Khanpughü-ah ng’ngaih-ah mi om kia hnging vai lam na m’shüm gui u neh m’pum kyä cuh vuuk kat nak-ung ka noh na ghun pe gui ci gui.

Na m’ngün htei ca Khanhtapup mi hmat vai-ah mi k’tha na ko. Mi ng’hta püi ko. Mi thüi hlei yah, Mi k’pung k’cawi yah, Kat nak-ung mi luh yah-ung ana gung tu vai mi ng’hui na ko. Hngüp täi ni bä nak gui mi ng’hui shan nak gui ko.

Khanhtapup gui cuh mikmi gui-ah tah hnguh hmat tu ba u neh hu ham phih däm ca kia neh Khanpughü-ah phan-ah om u hleih mikmi noh mi üm hta tu vai-ah kia ci.

A k’tung pi-ah na ngün m’htei ca Khanhtapup gui cuh mi shüm hmat gui-ah chin ci.