Bä ciah Basil lah Bä ciah Gregory Nasiansan ah ghünlu a mòng
K’hngi lo lam ah om ciah Yahteih gui ah Taigü Mâng ah kya ciah Bä ciah Basil cu Christu kum 330 ung Turky ghunkhaw Sysariah Mângggo ung ng’tüi ciah kya ci. A ni cu gregory Nansan awn a täng ah Atin Mânggo ah hteit ne ca ng’thei tu ci goi ah kya ci. Ka ni cu cang ciah Christian k’chang ah a ni kya cu yei tu ni ne phaya kyawng lah ca ng’ng’thei nak ung a ni hngun tu pe ci gui ah kya ci. Khokum a k’sho ca ng’thei tu ni ne ta Basail cu hlatai maa ah htei ne kyün hloi ne om hleih a cun ung ka no kä sho pha hleih a ni ah hngu läk ci gui cu daa lo ciah kya ci. Christu kum 370 ung Sysiria mânggo ah Taigü Mang tumat ah kya lo ne yumtung’bum ung bi bi ci gui m’shuuk chaak gui ne Boi Yesu cu Khanpughi ah kä kya ci, hlüngtai pi ciah tüipyan k’chang tumat ah va kya ci ci cu ng’hngu ng’tuk püi ciah kya ci.
Tui gha, ei ah coi ne a kya yah ung a ni cu ngami gui am ei k’ok pe gui ci. A ni ah ghuih ciah a guk ah ca gui lah a m’thei m’cäi gui ah phäh ah Maha poih( ) ng’ming a mi peit ah kya ci. Ng’büh ng’mang k’chang gui am a pyein cu “nang mi ah khang ka shuuk ciah (ring) letsot tumat düt awn a phu kä thung hnging ci gui thong khui kyong ung ka no na mi m’hlot ba hnging khai, nang mi ah hlui hlak ng’yung ät hta düt awn duyai ne a hlui vai kä om ci gui a k’daa na mi hui m’hlak hnging khai” ci ne pyein ci. A kya ah bong bai ne bi a bi lah a läk lam gui ah phäh ah a k’tha ng’hngoih lo ne Christu kum 379 ung a ni cu dhih ciah kya ci.
Constantinoble ah Taigü Mâng ah kya ciah bä ciah Gregory cu Christukum 379 ung Turky ghunkhaw Nasian Mânggo ung ng’tüi ci. A ni ah a pa cu Nasian Mânggo ah Taigü Mâng ah kya ne khokum 45 peng peng a cun ung Khanpuhgi ah mong lam gui thähla m’thei m’thang ciah kya ci. A teihpüi ah kya ciah bä ciah Basail bang tu ne Yahteih Taigü tumat ah kya tu hlü ne a ni no a bi ah ca m’thei nak cu nong ciah kya ci. Bä ciah Gregory cu khokum 40 ung Arian yum läk k’chang gui no a mi k’bui nak awn yaica nak gui a bui awt kon ah Christu kum 375 ung Taigü mâng ah kya lo ciah kya ci. Tigü Mâng Gregory cu a bi loh vai gui leng khai ah a cun ah Mânggo ung gok hleih a ni ah a m’ca a tai ah phäh lah hlui k’ni kä hlui ah phäh ah k’chang gui no a k’ni ah kä do ci gui ah kya ci. Cung phih a k’hngu ah a ni no shingk’thum Khanpughi tumat ah mong pyein ne a m’thei m’thang ah phäh ah k’chang a k’daa no yum m’nai lo tu ci gui ah kya ci. A ni cu Tamah Htin Co hnguh hmat k’chang tu mat ah poih gah ciah kya ci. A ni cu Christu kum 390 ung shih hleih a gok cu Roma Mânggo St. Peter Phaya kyawng ung a mi tha ah kya ci.
