Bä ciah Thomas Becket ah ghünlu a mòng

Canterbury ung Taigü Mâng ah kya ciah Bä ciah Thomas Becket cu Christu kum 1118 ung London ung ng’tüi ciah kya ci. A kho kum 25 ung Deacon ah kya lo tu ne Canterbury ung Khanpughi ah mong lam gui thähla m’thei m’thang ciah kya ci. A cun ung ka no kho kum gha be lo hleih a k’hngih nak Shangpughang Henry no Becket am shangpughang ah imu ng a ng’vai tumat ah kya ne bi a bi vai ah pyien hleih a cun ah bi ciah kya ci. A cun ung kho kum k’chüüit bi ne England kho ah Taigü Boi ah kya lo ci. A cun ung ka no Shangpughang no a peit ah a bi loh vai gui nong ne yumtu ng’bum ung biloh vai ah hlü ci gui leng ne bi ciah kya ci. Christu kum Yumtu ng’bum ung Canan  Law awn kä ng’awi ne ng’hngu ng’tuk ciah Constitution of Cloredon ung lethmat a  mi tho hlak cu dam ciah kya ci.

A cun ah dam hleih a ni cu Pyinhtit kho ah a mi k’täm ah kya ci. Pyihtit kho ah kho kum k’chuk sho om ne Christu kum 1170 ung London ung hteit ba hleih Shangpughang k’bäi ciah k’chang k’phli no a  mi ngon ah kya ci. A shi kon ah kho kum k’thum sho hleih yum tu ng’bum no a ni cu bä ciah k’chang tumat ah kya ci-ah a m’hlüng m’tai ah kya ci. A ni a mi k’phuh nak ah ukku cu Europe pum ung a kya ah a ming thang hleih a k’cum ah a cun ah ku ung k’taigü khai gui cu hteit ci gui ah kya ci.