Bä ciah Peter Canisius ah ghünlu a mòng
Catholic yumtu ng’bum ung hnguh hmat nak k’tung ghuih ne ca uk gui pyang tham ne yoi tuk vai ah leng lo ciah Peter Canisius cu Christu kum 1521 ung Holland ghunkho Nijnegen ung ng’tüi ciah kya ci. A pa ah ng’yak hlü ah hlo ah Louvain University ung Law hnguh hmat nak a pi k’chu ng’thei tu te ci a ni ah ghünlu lam ah kä kya ci ci-cu hmat lo ne kä k’chumah ein ne ta yum nak lam ung hnguh hmat vai gui ng’thei ng’thang tu khai ah Cologne ah htei tu ciah kya ci. St. Ignatius ah hlüläk ah kya ciah Peter Faber ah Retreat tumat ung a mi m’thei m’thang cu a ng’yak tuk on ah Jesuit ng’htoi un glut tu khai ah a m’lung phukpit ciah kya ci. Taigü Boi ah a kyat u kon ah PeterCanisius cu Khanpughi ah mòng lam a m’thei m’thang nak ung a ng’ming thang lo ciah kya ci. A cun ah kya hleih Bä ciah Ignatuis no Peter cu a í a bi ung phih a k’ni ah kya khai ah pyang tham ne k’chang gui ah thei bang tu hlü vai ah kya ciah Khanpughi ah hlü läk k’chang ah kya ci ci-ne pyein ciah kya ci. A ni cu Roma ung ka no Germany ghunkho ah tüi u ne yumtu ng’bum ng’hngu ng’tuk püi ciah a mi yum a mi läk lam gui cu a m’dí k’hmaih vai ah k’tha na ciah kya ci.
Christu kum 1552 ung Bä ciah Peter Canisius cu Catholic yumtu ng’bum ah läklam gui ghunkho ung om ciah k’chang shing 90% no a mi nong ah Vienna ung a mi tüih ba mä ah kya ci. Taigü gui ah om nak ah kyawn gui a k’daa cun phih om na ne kä gah ein khai ah dídam ne khokum 20 pum ung Taigü Boi tumat phih kä om tu pha ciah kya ci. Peter Canisius cu a ni ah k’chang gui ah k’khan ah k’chü k’nga gui ne a gunghtot nak gui ah bi gui a k’cum ah bi ne a kya nak awn Vienna k’chang gui ah m’lung k’nga ng’thong ng’hlat khai ah k’thüng gui hnging ciah kya ci. goipyam cia gui m’tui m’hleih pe gui ne thong khui k’om gui ah om nak ah htei ne k’tha pe gui ciah ng’thu awn ng’hta püi gui hti ciah kya ci. Duyai ci gui phih gunhtot gui ne k’chang gui ah ng’hnguh ng’hmat ng’hta ng’ko nak gui phih a kya ah hlü ci ci-cu hmat lo ne a k’ni pi ah a bi loh hnging vai ah Catholic yumtu ng’bum ung ca uk gui pyang tham ne yoih tuk nak hnging vai cu k’hmong ciah kya ci.
Peter Canisius cu a ghün Yah ung a ni no yum nak lam ung ka ca uk gui pyang tham ne a yoih tuk nak 200 vei lo ciah kya ci. A cun gui cu k’chü ng’thu 15 awn a k’phan ah kya ci. A ni cu a cun ah a bi loh gui aung tang ne kya tu lang pang hleih phih a m’lung m’yo m’nem ne k’chang ah k’chü ng’ngai ne om ciah kya ci. A ni cu ming thang ci gui a í ah kä ng’ngaih läi ah kä kya nga ci te Taigü Mâng ah a kya vail ah a mi ng’htoi ung a ng’vai tumat ah a mi ghü cu dam ciah kya ci. Bä ciah Peter Canisius cu Christu kum 1597 ung Fribbourg ung shi ciah kya ci.
