Bä ciah Flannan ah ghünlu a mòng
Ireland pak’khui k’chang ah kya ciah Flannan cu Yahteih tumat ah kya ne Roma mânggo ung Taigü Boi ah kya lo ciah kya ci. A ni cu tui no a hteh ah lung k’bow nu ng’cum ne Roma mânggo ah gok ciah kya ci. Roma mânggo ung ka no hteit ba ne Killaloe mânggo ung maa-pi k’bäih ne Taigü Mâng ah kya lo ci. A hei Irish Yahteih gui cun phih Flannan ah hlo ah hteit hton ghüi ne Khanpughi ah mong lam thähla m’thei m’thang ci gui ah kya ci. A ni cu Khanpughi ah maa ah hting ling ciah htok’shäm tumat ah kya ne a m’lung m’yo m’nem ciah Khanpuhgi ah phan ah k’chang ah phih kya ci. Taigü Mang tumat ah kya ne, a ni ah pei ah bi bi ci gui awn a täng ah ng’et ne om u ne ngami gui am hnguh hmat nak lah k’taigü nak gui ung a k’ni ah hlochang gui ne lam m’shüm gui ci. A ni cu däm ciah m’yung aa gui a m’dang vai kä kya ein ne hting ling ne lang hta ciah ghünlu awn a om ah phäh ah k’chang a k’daa no a hmat ah kya ci.
A ni ah ghünlu ung a pei ah om ci gui awn a täng ah hteit hton ei ok ne ngami gui ah a mi yaica gui ng’pai tu püi gui ne a k’chü ng’lung düt awn kä kya ein hleih a bi hloh nak awn Boi Yesu awn ng’et lo pi hti vai ah ci hnging ciah kya ci. A ni ah ghünlu no Khanpughi ng’ngai ne, k’chang gui ghung m’htei ne lam m’shüm ci ci-cu m’dang hnging ciah kya ci. Scotland k’hngi kyak lam ung om ciah k’pyha ng’tang hta gui cu a ni ah ng’ming awn a mi bi ah kya ci. A í kya hleih ci ung a ni cu a cun ah k’pyha ng’tang ung htei ne läk lam gui awn k’taigü ne om man ciah kya ci. A cun ah k’pyha ng’tang ung Flannan ah k’taigü nak ah lung k’pow gui cu om ciah kya ci.
