Guadalupe Nu Maria a mòng
Christu kum 1532 ung Nu Maria cu Maxico ghunkho, Guadalupe pigò ung Tuan Diego am m’dang ciah kya ci. A kya ah kyom htang ne om pya ciah December k’cha a k’hngüp 9 hngüp kho ng’ngoi hta ah Tuan Diego cu phaya kyawng ah a hteh yah ung k’pyhuuk k’kha gui ah yei nak vai ah a mi ng’ghünko gui awn a täng ah k’hngumi nu tumat cu Tuan Diego ,Tuan Diego ci ne a mi chü ah k’o cu ng’yak ciah kya ci. A cun ah k’o ng’yak lo ne lam pheng ung om ciah k’päng ung a u no a chü hmat hlü ne hei dan hleih kho k’hngi vai hlü ah k’khang kha shuuk ne a phu däm ciah lung ah k’khan ah ng’düi ciah Nu Maria cu hei hnguh ciah kya ci. Nu Maria no kei no k’chang gui ah k’khan ah ka m’hngi nak, ka gunghtot nak lah ka ghung m’htei nak gui bi lo ne ka m’dang vai ah a shin ah k’päng ung phaya kyawng tumat coh vai ka ng’yak hlü ci ci ne Tuan Diego am m’thein ciah kya ci. Nu Maria no a cun ah a m’dang ah mong cu Tuan Diego no hteit ba ne Taigü kho k’ngäng Taigü Mâng am a pyein gui a van m’thein ba hleih Taigü Mâng no a cun ah mong cu a k’cang ah kä kya khai ci ne kä k’bäi ciah kya ci.
Tuan Diego cu a cun ah k’päng hta ung hteit ba ne “ Nu Maria ah om nak ah “ a kya ah m’hngi k’hma vai ah kya ciah Nu aw shin ah yaica buiawt nak awn bi vai cu a k’tung ah bi hnging khai am na m’dang ah a kya ung ngami gui no yum u ne bi khai gui nei. Kei cu a kya ah pyam ne duyai ciah k’chang tumat ah ka kya ci ci ne pyein hleih phih Nu Maria no “Ka hta aw.. ngoi ung khongoi hta ah Taigü Mâng ah om nak ah hteit ba ne kei no ka ning tüih ah na m’thein ba vai ci ne pyein ci. Tuan Diego cun phih Nu Maria ah k’chü ng’ngai ne Taigü Mâng ah om nak ah htei ba ne pyein ba hleih Taigü Mâng no kei am m’dang nak tumat mat na na k’hnguh vai ci ne pyein hleih Tuan Diego k’päng hta ah hteit ba hleih Nu Maria no Tuan Diego am k’päng ung om ciah na hnguh phung ah hnginsi papai gui a van ko ne na hlui tumat tung htun ne na thak vai ci ne m’cäi hleih Tuan Diego no a cun ah a ci ah kya ci. Taigü Mâng ah mà ah a cun ah papai ng’tun cu pyhak ne a ci yah ung cäicat vai ah a cun ah papai gui ah k’khan ah Ng’lami hta Maria cu ng’dang lo ciah kya ci.
A cun ah m’dang nak a hnguh kon ah Taigü Mâng cun phih Nu Maria ah k’chü ng’ngai ne a m’dang nak ah k’päng hta ung Phaya kyawng tumat a coh ah kya ci. A cun ah Phaya kyawng ung a m’dang nak ah hlui cu m’nai u ne gänap ne a mi htin ah kya ci. Guadalupe Nu Maria cu a kya ah a ng’ming thang lo ne A merican k’chang gui ghung m’htei ciah Nu Maria ah kya lo ci.
