Bä ciah Ambrose ah ghünlu a mòng
Milan ghunkho ghung m’htei ciah bä ciah Ambrose cu Christu kum 340 ung Jermany ghunkho Trier mânggo ung ng’tüi ciah kya ci. A pa a shih kon ah Roma mânggo ung k’däih ne ca ng’thei tu ne ta a k’hngu ah Milan mânggo ung mânggo m’ngäng ciah a ng’vai tumat ah kya lo ci. Christu kum 373 ah chüt hleih a ni cu yum hlei k’chang tu mat ah kya ciah kya ci. A k’hngu ah k’chang a k’daa no ät u ne a mi k’bäi nak awn Millan mânggo ung Taigü mâng tu mat ah kya lo khai ah a mi ghü ah bä ciah k’chang ah kya ci. A cun ah a mi ghü ung ka no leng ne m’shi nak Sacrament u ci tu ne Taigü Mâng ah kya lo ciah kya ci. Taigü Mâng ah a kya lo kon ah a ni ung om ciah khoh tang gui a van pyam ne duyai ci gui ah k’chang gui am gänap peit tak gui ciah kya ci.
Cun kon ah a mät ah kyä lah a m’lung a van k’chang gui a van ka vai ah k’tha na ne a ghünlu Khanpughi am gänap ciah kya ci. A ghünlu a k’ni hta ah theing khai ah pyang tham ne k’chang gui ka vai ah bi bi ciah kya ci.A k’cum ah ng’thu k’ni k’khei ne a cun ah ng’thu k’ni cu k’chang guui am m’thei m’thang ne om ci. Milan ung Taigü kho ung om ciah phaya kyawng ung Khanpughi ah mong lam Bä ciah Ambrose no a m’thei m’cäi ah mong ng’ya tu ciah bä ciah Augustine cun phih kä ni ciah m’lung nga ung ka no a m’lung k’nga k’ni lam ah ng’thong hlat lo ne a ghünlu pum ng’thong hlat khai ah pyang tham lo hnging ciah kya ci. Yaica buiawt nak gui a k’daa om tu lang pang hleih phih Ambrose cu yum tu ng’bum ah kho ah kya ciah htipow nu yoi ne thong khui k’om gui lah duyai k’chang gui gunghtot gui ciah kya ci.
Ambrose no a pyein cu a vai hlü ung ka yum tu ng’bum no ghui khoh a sham ah a kya ung phih a cun ah ghui cu hlü ci gui gunghtot nak gui vai ah kya ci. htin vai ah kä kya ci ci ne yum tu ng’bum m’shuuk kyak ne k’nga k’phlang gui ciah kya ci. Htitheing nak ah ghünlu awn om ne läk lam gui awn a mi ghünlu gänap khai gui ah k’hngumi hta gui cu a ni ah k’phlang nak ah k’kaa ah m’htoi gui ne tha gui ciah kya ci. A cun ah a ci ah phäh ah Imperor ung k’hngumi hta gui ken lo khai ah a ci ci ne k’puk u hleih Taigü Mâng Ambrose no a cun ah pyein ci gui am k’chang gui ah ng’shon díí khai ah ci ci gui cu a cun ah ng’lami hta gui ah kä kya ci, ng’tuk ah nak ka va kya ci ci ne m’shang tu ba gui ci. Bä ciah Ambrose cu a kho kum 57 ung shih hleih a gôk cu Milan phaya kyawng ah a mi k’phuh ah kya ci.
