Scotland ghunkho ung ka Bä ciah Margaret ah ghünlu a mòng

Scotland ghunkho ghung m’htei ciah bä ciah Margare cu Christu kum 1046 ung Hungry ghunkho ung ng’tüi ciah kya ci. Norman ga k’kap gui no a mi om nak tuk gui khai ah hteh shi gui u hleih Margaret cu Scotland ah dong ciah kya ci. A kho kum 24 ung a k’thum nak Malcolm III awn let that ne a ni hta gui 8 gah ci goi ah kya ci. A ni cu k’chang gui no a mi ngak tu ah Nu tumat lah ng’kyüm be ciah shangpinu tumat ah a kya ci m’dang hnging ciah kya ci. Margaret cu a ni ah m’hngi nak lah hngip hngäi nak awn a cei ah m’lung k’she nak gui ung ka no m’hngi ng’kyu nak awn bi bi lo hnging khai ah k’nga k’phlang hnging ciah kya ci.

Taigü gui ah ng’müi m’cha lam ung a k’thai ah ng’thong hlat ba khai ah a m’hlüng tai ba peit gui hlü ah phä ah kyün k’hngüp gui ung kyünhloi ne, ei ok gui hloi ne, k’taigü ne om vai gui cun phih a ni no a bi vai ah mong ah kya ciah ng’ngai bi ciah kya ci. Margaret cu Phaya kyawng a k’daa phih co ne Phaya kyawng ung hlü ci gui cun phih ng’kyüm be khai ah peit ta ne gunghtot ne a mi m’lung ng’shung hei ne hti ci gui ah nu gui ng’bum cun phih pyang ciah kya ci. Ng’yoi ne ei ciah k’chang tumat düt phih Margaret ung ka a ì kä gah ne hteit ba ci ci cu kä om ciah kya ci. A ni cu Christu kum 1093 ung shi hleih a mät no a coh te ah Dunfermline Phaya kyawng ung a mi k’phuh ah kya ci.