Ng’Kyüm Be Ca Gän Ap Nak
Gän ap peit taak nak ci cuh mikmi gui noh mi htin hlü mi shäm hlü-ah khoh tumat ku ku cuh Khanpughü-am kä cun-ung k’chang hngei-am m’hngi nak-ah m’lung-awn ang’pyi-ah nong neh chah nak-ah kia ci. Gän ap nak gui cuh ak’da om ci. Vai hlü-ah ngui ak’da m’cun neh tah cun-ah ngui-awn du dong ci gui gung tu nak gui hlo phih gän ap nak tumat-ah kia ci.
Ca leng nah k’chang gui noh Khanpughü-ah m’cäi nak gui ami lä hlu-ah Khanpugh gän ap nak cuh ana ak’bi vü ci gui-ah kia ci. Mikmi gui-am k’khanpughü noh ana peit gui-ah phäh-ah yei nak m’dang neh shüm hmat tu ba nak m’dang vai phäh, Khanpughü m’hngi nak m’dang vai phäh, Kat nak gui-ah phäh ng’yu ng’yawn nak ba m’dang nak vai phäh gän ap nak gui mi bi ci-ah kia ci.
Ng’thu k’theing-ung Adam lah Eve-ah ani hta gui-ah kia ca Kina lah Ebel ni noh ani geit kaw-ah k’thui an tawng ng’mai gui ni ng’lung ma gui ni bawi me gui cuh mei-awn m’chih neh gän ap man ci goi.
Gän ap nak gui cuh Jew pa k’khui gui-ah thum-ung ak’cum-ah hnguh hnging-ah kia ci. Ngami noh ami geit ko nak-ung-ah ak’ni pi-ah ak theih pai cuh ng’bum im-ah lo püi ci gui-ah kia ci.Vai hlü-ung gän ap vai cuh tho hta, me hta, hlei hta-ah akia-ung k’taigü noh cun gui cuh ngon neh ashi-awn kho k’kyak cuh m’htei ci. Capyitui-ah akia-ung kho k’kyak shoi na neh ni ca m’htup gui-ah akia-ung mei-awn m’chih neh gän ap ci gui.
Joseph lah Maria noh ani gän ap tu vai-ah mün hta k’hngih lo pü neh Bawi Yeisu cuh gän ap ci goi. Khanpughü cuh gän ap nak gui-awn ayei tu nak gui om tu lang hleih phih kat nak gui m’gein neh ani-awn ät nak cuh ayan-ah hlo-ah am’hteng ba vai phäh kä ng’kyün ci. Theing thap khai-ah pyan tham nak kä gah neh kyüm be ca gän ap nak cuh kä bi hnging vai-ah kia ci. Caw kia hleih Bai Christu cuh kho m’dek khan-ah kyum lo neh amät noh amät gän mikmi ka vai na gän ap pe gui ci. Vang täng-ah pyein-ung Bawi cuh gän ap-ah khoh aphih kiai, gän ap khai-ah k’chang-ah phih kyai na om pe gui ca kia ci. Ani cuh Khanpughü-ah phih kyai k’chang-ah phih kyai kia nak cuh k’hngih lo ca kia hleih mopi lah kho m’dek cuh m’chum goi ca kia ci.John Baptister noh Khanpughü-ah hto hta ci neh chü ca kia ci. Bawi Christu noh kat nak-ah phäh om lo ca shih nak cuh amät-ah shi-awn m’shi neh na k’phyawn ci.
Adam cuh kat nak-ung agok vai-am tah Khanmopi k’shoh cuh Bawi Christu noh kä k’phyon ba pha chüt hleih ng’khai ca kia ci. Hti theing ca ng’mü m’cha gui cuh ng’güng neh om ci gui. Bawi noh shih neh ana k’phyon gui vai-am tah Khanpughü-awn atäng-ah om tu nak cuh hnguh ci gui-ah kia ci. Tuhchü mikmi gui cuh m’shi k’pho nak Secramentu mi gah tu-ung leng neh mi theing thap tupi ca kia ci.
