Bä caih Frumentius lah Aedisius ah ghünlu a mòng

Bä caih Frumentius lah Aedisius cu ng’phäi ng’na vai hlü ah a täng ah om ni ne ei ok ät ci goi ah kya ci. Ethiopian yum tu ng’bum a mi ng’düih ah yah ung ngani ah khong mang pyein hlak gui a van cu k’chang gui no a k’ni ah ng’ngai ne läk ci gui ah kya ci. Ngani cu a ni k’hmo hta yah ge ung tün ne Tyra Mânggo ung om ciah a ni phuh shung ah kya ciah Meropius awn a täng ah Ethiopia ah gok tu ci goi ah kya ci. Ngani cu Arabia ah a ni hteh nak ah pinle lam ung a ni buiawt nak ung ka no ghüng ne k’poih ghüt ci goi ah kya ci. A mi ng’hta ng’ko nak ung a mi ng’cuh ng’vah gui om lo hleih Ethiopia gui no ghüh tu gui ne Htinpaw k’khan ah om gui a van a mi ngon gui ah kya ci.

A m’shah cu Htinpaw dí hleih shih ci gui ah kya ci. Ethiopia Shangpughang Tigre pyhong ci goi ah Frumentius lah Aedisius ah yei nak vai ah a ni om k’ih lah a ni hnguh hmat k’chü ng’hta cu hnguh hmat lo ne hnguh hmat nak lam ung a k’ni ah ca nga ni ng’thei ng’thang tu hnging vai ah ci peit goi ciah kya ci. Aedisius cu Shangpughang ah ghui bät k’khot khai ah kya lo ne Frumentius Shangpughang ah ngui gui k’kot khai ah k’chang ah kya lo ci goi ah kya ci. A k’hngu ah Frumentius cu Ethiopia ghunkho ung Taigü Mang ah kya lo ci.