Ni Bä Nak gui Nong Ghüt Nak
Khanpughü noh Adam lah Eve cuh go nak, ghü nak, shih nak kä om-ein khai-ah ni bä nak gui k’pe goi neh m’om goi ci. Ngani cuh hti theing ca ni bä nak gui-awn Khanpughü cuh ani teih püi vai hlü-ah atäng-ah om tu vai cuh hmat ci goi.
Khanpughü noh ngani cuh Khanhtapup gui a cam gui-ah hlo-ah ngani cun phih cam goi ci. Khanpughü noh a peit goi-ah ni bä nak gui-ah phäh-ah ani shüm hmat tu ba vai ng’ya hlü ci. Cunte Khanpughü-ah k’chü cuh kä ng’ngai ci goi. Eve cuh kho k’nget-ah k’chü ng’ngai neh Khanpughü-ah m’cäi cuh k’hlet ci. Netah mä Adam cuh tawk neh phong tu ba ci.
Adam lah Eve noh Khanpughü-ah k’chü kä ni ng’ngaih nak ba hlu–awn ni bä nak gui cuh ani ng’mü m’cha cuh ng’htät ci. Ngani cuh kyüh ng’aa nak-awn atäng-ah kat nak k’däm bi püi ci goi-ah mong cuh hmat lo ci goi. Ngani cuh Khanpughü-ah m’gein nak ani shan vai ng’aa ni neh ng’thup ng’shong vai neh pong ci goi. Cun bäng kä kia neh ani mät phih tumat noh tumat kat k’phüih vai neh png ci goi. Netah k’phyu-am phih kat k’phüi vai neh pong ci goi.
Mikmi mä ngani-ah hlo-ah kat nak mi bi lo-ung mi kya tu ni-ang? Adam lah Eve-ah ani kat nak gui-ah phäh ni bä nak gui cuh ng’peng lo ci. Cun cuh k’chang gui noh ma pi k’bäih neh ami bi lo-ah kat nak-ah kia neh mikmi noh mi ng’do tu ci. Ngani-ah kat nak-ah phäh-ah mikmi gui hngo mi gah tu cuh Khanpughü kä taga ci ci neh mi ng’ngai hngo khai. Cunte mi shüm ba vai cuh ngani noh ani gah te-ah ni bä nak gui cuh Khanpughü noh akho lä düt-ah apeit goi te ci-ah mi shüm ba vai hlü ci.
Kat nak k’htük-ah lam cuh kat nak vai täng-ah ng’voi neh kun-ah kia ci. Adam lah Eve-ah ani kat nak-ah phäh-ah Eden ng’vong-ung ka noh ami hlot goi. Ng’lei m’hlo nak, yai ca nak-awn be ca kho m’dek khan-ah ami m’om lo goi. Yaica neh ani hta k’hmo gui m’htei m’hta neh tu m’bei khai goi-ah kia lo ci. Nagni-ung ka noh ng’shawn lo ci gui cuh shih nak-awn hngun cuh m’chüp lo-ah kia ci. Ani mät-ah k’tha nak ba düt-awn Khanmopi-ah luh tu ba vai cuh kä gah ci. Khanpughü noh a hta gui cuh am’hngi gui hlu-ah cam nak gui van phlän neh m’chüt ca am’hngi pi-ah ahta k’pa tumat cuh Adam k’thai-ah kho m’dek khan-ah tüi lo ci. Bawi Yeisu noh m’dek k’chang gui van-ah kat nak gui lah nu pa k’htük-ah kat nak gui cun phih ak’phyon vai-ah shing m’kang k’tung-ung ashih vai cuh ng’ngaih nak ak’be-awn do ci. Bawi-ah ashih nak cuh Khanpughü-ah m’gein nak yum äp ng’ngaih u neh shih ci gui-ah k’chang gui ka vai Khanmopi k’shoh cuh ng’hmong ci.
Bawi Yeisu-ah shih nak lah ghün lo ba nak-ah ni bä nak gui cuh m’shi k’pyo nak Secramentu mi gah yah-ung tumat phäh phäh-ah mi gah ci. M’shi k’pyo nak Secramentu cuh nu pa k’htük-ah kat nak gui cuh k’hlet ci. Mi ng’mü m’cha cuh hti theing ca ni bä nak gui-awn na k’be gui hlak ci. Mikmi gui cuh Khanpughü-ah hta k’hngu hta k’pa gui-ah na kia lo tu hlak gui ci.
