Hti Theing Ca K’kyong Khui
Hti theing ca k’kyong khui cuh Egypt kho-ah ami lo ba yah lah Bawi Yeisu m’shi k’pyo nak a gah tu yah-ah ng’lak cuh amät-ah bi abi tu yah-ah aching ci neh chü-ah kia ci. Shin-ah a ching cuh ng’thu k’theing-ung phih kä hnguh hnging-ah kia ci.Cun yah-ung Bawi Yeisu cuh m’theing m’than nak cäi cat vai ma mong gui cuh kä bi phak ci. Cun yah-ung Bawi Yeisu cuh k’chang ng’neng-ah om tu ca kia ci. Ani cuh kat nak gui-ung kah noh a hti kon-ah mikmi-ah hlo-ah ng’vai lo tu ca kia ci. A nu pa goi cun phih hti theing nak-awn ghüng om ci goi. Joseph cuh ami k’pyu im gui bi neh a hngei k’chang gui cuh gung tu gui ci.Nu Maria cuh im k’kyong ma mong gui a bi-ah k’phei-ah k’hmo hta yeisu cuh hnguh hmat nak m’thei m’theing ci. Nu Maria cuh go pai ci gui lah du dawng yai ca ci gui, cawi gha ci gui teng m’kyein gung tu gui neh om ci.
Yeisu Bawi cuh a nu pa-ah bi loh ma mong gui gung tu neh bi püi goi neh om ci. Ngami cuh k’kyong khui k’kyong shuh shan nak gui cun phih bi tu hnga ci gui. Kyün k’hngüp cuh Khanpughü m’hlüng m’tai nak vai-ah khän tu hnga-ah kho k’hngüp-ah kia ci.
Bawi Yeisu kho kum gha lei goi a be lo yah-ung anu pa goi-awn atäng-ah Jerusalem mang go-ah hteit ci gui. Cun yah cuh Jew pa k’khui gui-ah hti theing pi ca poi-ah kia ca Pathaca poi yah-ah kia ci. Joseph lah Maria cuh Bawi Yeisu Jerusalem-ah ak’poih tu ghüt kä hmat ni neh a päi na gui-awn ng’gui lo tu ba khai düt neh hteit ba ci goi. Kho k’hngüp ät ng’lak lo na chü tah Bawi Yeisu kä lo tu ba cuh hmat lo ni neh cäi ng’ä neh ani shui nak ba-ung ak’thum k’hngüp-ung ng’bum im k’kyong-ah ng’thu k’shüm ng’vai k’chang gui-awn Khanpughü-ah mong gui ng’ge u hleih hngu ba ci goi. Ng’ya tu ci gui phung noh ani-ah hnguh hmat nak gui lah abi thei pyein thei nak gui cuh cäi neh ng’ngai tu ci gui. Nu Maria lah Joseph noh i kia hleih am’thüi goi-ah mong cuh kä hmat ci goi. Nu Maria cuh cun-ah hlo-ah kä hmat neh a vuuk yai tu nak gui, a do vai-ah age-ah aom nak gui, am’hteng nak gui lah ayum aäp nak gui-awn k’phyon ca Bawi-ah nu-ah kia chin hleih kia ci. Bawi Yeisu cuh Nazareth mang go-ah gok ba u neh anu pa-ah m’cäi cuh ng’ngai neh om ci. Na nu pa na üm hta vai ci-ah Khanpughü-ah m’cäi cuh ghü neh läk tu ci.
