Bä Ca Yùmnak Ca Ngbú Guk Nì lah Amòòng Lam
Catholic Htahtana ah bä ca yùmnak cuh akdá on akkhak ah khò ngshông ung ngcut ngdòn neh biloh ah phäh ah gah-tang nak a nglon ah kya ci.Cun cuh khòkum kchuk shô khai kthá na häih häih neh kä ngyihngkuh khai bi vai ponghtêi ah kya ci. 1986 kum ung Ktàigü Amat (12) on Sayataw Ktàigü Mâng Ktùng gui bi ca,tuhkbäih Ktàigü Amat. Joseph Rasingar noh ktàigü gui khòngmàng neh ka mhtòi mkhóp hlak ah kya ci. Ngami ah màmòng cuh Sayataw gui ah nghtòi nak. ung gok lo ci gui ah ami ngyák hlü ah Bä Ca Yùmnak ca kyàm gui pyantham ba vai kya ci. Shin ah komiti ah biloh gungkûm vai phäh ah pâhtâ yùmnak lah mthêimthàng nak gui ung tat-lah ca nghtòi uk Sayataw(7)am ca gä-hlêi vai ka màmòòng nak hlak gui ah kya ci.Cun kon ah pahta hnguh hmat kchàng akkhak,ngthû kthéing kphlàn hnging ci gui lah ngthûkní mthêi ci gui kon ah phih khòmdek kkhân ah Sayataw gui ah ami mlùng ngngaih gui mhteih neh ktäih ba cang ah phih kya ci.
Acun ah bi ni ca “‘Lam Mshüm Ca Ngbú” pyan hnging vai phäh ah kya ci. Komiti ung mlùng ngngaih akkhak mtùmtäng neh ktäih ah kya neh hlüng tài ca bä nak gui om hlak ci. Cun ah kya hleih ngkyüm bé ca ca ngbú phih gah ah kya neh komiti ah mcun neh a mdáng cun phih ngkháikhapèng hleih ngdáng neh nghmat khai cuh mdek púng ung kä ngchêi khai kya ci. Pongpüî bü cèng läí cuh Catholic Ktàigü Mâng Ktùng Sayataw gui,ngdükhò kchàng sayataw gui on ngkhîngngkhong ca a nghtòi ngkhóp gui,pâhtâ mòòng mthêimthàng ca nghtòingkhóp gui ah nglak ah a ngshông ah phyah hleih ngah-tüh neh nggè ngshòi nak ung ka noh gah-tang lo ah kya ci. Aktôi ah m’än neh pyéin ah akya ung Ktàigü Mâng Sayataw gui ah akní ah ami khngà kphlàng nak gui lák hnging ah phäh a phih kya ci.
Shin ah bä ca yùm nak cuh vâng ah pyéin ung Catholic Htahtana púm ung om ca Sayataw gui,a nghtòi ngkhòp gui ah ngcut ngdòn biloh nak ah a nglon ah pyêin ung kä hmà khai kya ci.Cun ah Sayataw gui cuh ka khngà kphlàng yùm neh dó chàng u neh htahtana ghinlù ah biloh nak on pahtak ci gui. Ngami ah mhlánnak cuh kei ah akthúk ah yèikyài nak ah kya hlak ci. A i ah kya hleih ci ung akdá lènglèng ah pyéinhlak k’ó mlèi nak gui cuh ng’äî ng’om vai hlü kcàng ah ngdáng ci. Shin ah “Bä Ca Yùmnak” ah ong ngtang nak cuh Papa Shangpùghang ah khngà kphlàng sayataw ah ami nggèngshòi ah mlúng ngngaih mdáng ci. Catholic htahtana ah khlí on a ngkhîng ngkhong mdángnak ah phih kya ci.Amòng amà gui mcùn mdònnakShin ah bä ca yùmnak cuh Kyanca Ngthûkní phih kyai,Saya khtük ah phih kya ca Yùm Ktû Ngbûm Htahtana am phih kyai,Htahtana ah ghìng om ca thùng yò on phih kyai,Htahtana ah hnguh hmat kchàng gui lah bä ca kchàng gui ah mòòng phih kyai mthêin mdáng nak ung a htìnglìng a khläk kkhäm vai phäh ah phih kya ci.
Cun kòn ah Christian ah thúk ca mòòng hmat lo píhti vai mkot khmón péit vai lah Kkhânpùghí noh a ghü ah kchàng ngbûm gui ah yùmnak a ghin om vai phäh ah kya ci.Ngmùi mchà kthéing cuh a mät ah htahtana am kum phya ngbûm kkhak ung a ngdäih ah a hmat lo hlak ah yùmnak mòòng mthêimtháng gui kboih neh ngah-tüh khîn ah kya ci. Ayân kä om màn ca amòòng kthài gui lah a nggó nggài gui cuh yùmnak ah akkhâng on dèi kkhâng khai ah gungkûm hnging ah kya ci. Acun ah kya neh”Bä Ca Yùmnak” cuh Ngthûkthài Ngthûkphyím” cùm päng khai kya ci.(Mateu:13:52). A i ah kya hleih ci ung yùmnak cuh akcùm ah täng khai kya tu láng pâng hleih phih a ngtünnak cuh akcúm ah akkthài ah kkhâng khai.Shin ah ngshînak mhlán vai ah akya ung ”Catholic Htahtana ah Bä ca Yùmnak”cuh cá amòòng amà gui kphlì ah kpâi neh mdángnak ah kya ca akhmâ nak bä ca kcháng Pius ah Bä Ca Yùmnak atäng ah läk màn gui ah cá thùng màn gui ah kya ci.Cun gui cuh yùmnak ah a ngchüpnak,bä ca Sacrament mtúng ca bä ca ktàigünak ah nì lam gui,a mcäì mòòng ghà lèng neh kpphlàn ah christian ghinlù,akhngú ah christian gui ah ktàigü gui mdáng ah kya ci. Amòòng ngpài kphlì cuh tumat lah tumat ngshün ngphan ci.
Amòòng khtük ung christian gui ah thúk ca yùmnak cuh yùmnak ah bücèng ah akya ah mòòng mdáng ci. Akhngih nak ung ktàigü nak ah mòòng lam gui on Missa gän ap nak gui bi vai mshünmphan pe ci. Akthum nak ung Kkhânpùghí ah hta gui cuh ami om ih ah phäh ah ami hnguh hmat bä khak hlak ci.Akphlî nak läí cuh mi ktàìgü nak ung ngyung ci. Acun ung chà tu hngá hleih mdáng nak cuh Kkhãnmòpí ah om ca ktàigü ah kya ci. Shin ah ktàigü cuh nghûingpânak,mi mtâmmkhah-nak lah nggèi ngkhotnak ba mdáng ci.Ktàigünak cuh nghûingpâ nak ah kya ci.Yùm äp mòòng kbäînak cuh mshùm mchuk mòòng bi nak ung akní ah hnguh hnging ah kya ci. Bä ca Sacramentu gui ah aktheih pâi gui ah kya ca bäkhäk nak gui cuh. christian gui ami ghin om hnging vai phäh ah htahtana ung cùm bòi vai yúm nak cuh akya ah ahlü ah ciah a hngün kä thung hnging ah amòòng ung om ci.
Yùmnak kä mdâng hnging ung shih vai hlü ah(Yakuk:2:14-16)hngùn ngdün ghinnak ah phäh ah kä ktheih pài hnging khai. Catholic Htahtana ah bä ca yúm mòòng kkhêi teng nak ung yùmmnài vai gui ngcut ngdòn ca Kkhânpùghí ah a thúk nak gui mi hngu hnging ci.Cun kon ah kphyón hlü ca mlùng ngngaih,Bòi Christu aktúng ah akya mòòng mi hngu hnging ci. Mi Kphyón Bòi ah akya hlak vai ah A Htá Kpâ tumat bä ca ngmùi mchà ah myung â on Nglàmí Mària ah pukkhùi ung Kchàng ah akya vai Pá Kkhânpùghí noh a tüih lo ah kya ci. Bói Christu cuh na shih pe gui neh ghìng lo ba neh aktúng pí ah bä ca Sacramentu ung om neh A Htahtana on a ngtäih ah om ci.Ani cuh mi yùmnak ah a ngyung a khong ah kya ci.Ani ah om ih,thêibang vai lah Ktàigü Saya ah phih kya ci.Yohan Polu akhngih-nak
