Shih Kon-ah Bui Vai Gui
Shih Nak
Chang ci cuh kyä lah m’cha ng’dawn hleih ghüng ca a hngun k’ghüng-ah kia ci. K’chang tumat shih ci ci cuh kyä lah ng’mü m’cha ani ng’tai-ah kia ci. Shih nak cuh kho m’dek khan-ah om yah-ung Khanpughü shui lei nak lam-ah ng’hleh nak-ah kia ci. Cun-ah Khanpughü shui lei nak lam hteh yah-ung Khanpughü noh ni bä nak gui lah mgein nak gui cuh be khai-ah pe ca kia ci. Shih nak ci cuh Baei Christu-ung Khanpughü noh am’dang püi te-ah Khanpughü-ah ni bä nak gui cuh má vai lah daw vai-ah c ching-ah kia ci. Shin-ah hlo-ah k’chang gui cuh Khangpughü-ah bü-ah ci-ah mät-ah ghü om nak-ung bi loh vai phäh lah ak’hngu pi gok nak hlü cuh ghü vai phäh kia ci.
Chritian gui cuh shih nak-awn kä ng’pyi tu ci. Shih nak cuh Bawi Christu-awn atäng-ah hngun k’thai-ung ghün nak vai phäh ng’plawn-ah kia ci. Christian gui-ah ak’hngu pi bü ceng nak gui lei cuh Khanmmopi-ah kia ci. Bawi Christu-ah ni bä nak-wn shih ci gui cuh ani-ah ghün lo nak ba-ung ng’dawn tuneh ghün lo nak ba-ung phih ng’pam tu khai-ah kia ci.
Tumat Hti M’cha M’lang Nak
K’chang cuh ashih kon-ah akyä cuh k’puh m’cum-ah hlo-ah k’chang cuh ashih vai-am tah m’cha m’lang nak cuh hnguh khai-ah kia ci. A ni-ah ni sheit gui-ah ci-ah taga hleih m’ch m’lang nak cuh gah khai. Cun-ah k’chang-ah ng’mü m’cha cuh ang’shung hngei-ung Khanmopi-ah phih kyai, Cun-ah k’chang-ah hma kat nak gui phäh kä ng’tu ba neh, Khanpughü-ah ni bä nak gui cuh má neh kat nak däm gui aom-ung m’htei kho phih kyai, Kat nak gui om tu lang hleih ng’yu ng’yawn ba ca k’chang cuh m’htei kho k’yo phih kyai hteit khai-ah kia ci. Ghün yah-ung mi om kya-ah ci-ah ni nak lah kat nak cuh mi gah khai-ah kia ci.
Khanmopi Ghui Im
Khanmopi ci cuh kyüm be neh hti theing ci-ah shing k’thum Khanpughü tumat-awn kong ät tu neh ghün nak lah Hti theing ca ng’lami hta Maria ni, Khanhtapup gui lah k’chang k’bä gui-awn atäng-ah ghü om nak tu-ah hngun ghün nak-ah kia ci. Khanmopi-ah om tu nak cuh Bawi Christu-awn atäng-ah om tu nak-ah neh aghü k’cei gui cuh Bawi-ung om tu ci gui. Bä ca k’chang gui-ah ghü om nak cuh Baei Christu-awn ng’hleh pi ca k’phyon nak k’theih pai gui cuh ng’kyün be hleih gah tu ci gui-ah kia ci. Hti theing neh bä ca k’chang gui lah m’hngi nak-awn be ca pa khanpughü-ah om nak cuh Khanmopi-ah kia ci.
M’htei Kho K’däm
Khanpughü, Hti theing ca k’chang k’bä gui-awn atäng-ah om tu nak vai gui cuh ang’pyi-ah nong nak cuh m’htei kho k’däm-ah kia ci. K’chang cuh amä-ah kat nak gui-ah phäh kä ng’yu ng’yawn ba neh K’khanpughü-ah ni bä nak gui, m’hngi nak gui cuh má neh kat nak k’däm gui aom yah-ung shik ca k’chang cuh m’htei kho k’däm-ah gok khai-ah kia ci.
M’htei Kho K’yo
Ng’thu k’theing lah Yumtu ng’bum-ah kä ng’thong hnging khai-ah yum nak gui noh Khanmopi-ah M’htei kho k’däm aom-ah mong cuh yum ca kia ci. M’htei kho k’yo cuh ng’thu k’theing-ung kä hnguh tu lang pang-ung phih ani cuh om nak hngün tumat-ah kä kia neh m’theing m’htaih nak-ah akia-ah mong cuh m’thei m’cäi nak-ung om ci. Khanmopi-ah gok tu ci gui-ah ak’hngu pi m’shi k’pyo m’theing m’htaih nak cuh m’htei kho k’yo-ah kia ci. Yumtu ng’bum-ung hnguh hmat ca ng’vai gui noh ghui cuh mei-awn ghui-ah ng’khai neh k’hteh khai-ah m’ghei neh shuk neh pyan tham-ah hlo-ah ghui-ah tah aphu hlüng tu ca k’chang-ah ng’mü m’cha cuh mei-awn m’theing m’htaih nak om khai ci neh tum nak-awn m’thei m’thang ci gui-ah kia ci.
Catholic Yumtu ng’bum noh m’htei kho k’yo cuh ak’cang-ah aom-ah mong lah shuh shan k’tai gü nak gui cuh ng’mü cha gui-ung ak’cang-ah agok-ah mong cuh m’thei ci. M’htei kho k’yo om ci gui kavai shuh shan nak gui cuh ni tu lang hleih phih ak’tung pi-ah miksa gü ap nak cuh bä pi ca kia ci. Yumtu ng’bum noh ng’mü m’cha ka vai peitak nak, shuh shan nak gui, Indogencia gak nak gui cuh bi vai-ah ak’tung-ah m’thei m’thang ci.
