Kchòkhò géitkò mòòng lahKphyá ngtàng gui
A ngling nak ah khò gui ung tûilì kkàm gui ung kkóng shing ghàm gui on mtäng hnging ah kphyá ngtàng ngtän gui hnguh hnging ah kya ci. Acun ah htanta kphyá ngtàng gui ung tûi k’om a hngùn kghìng gui akkhak ah ami nglênchah ghing om nak ah ngdü gui ah kya ci. A cun ah akghìng k’om gui ung kah ngá,kîkòng,ng’âi gui lah ahêi a hngùn kghìng gui a hlühlü lah tûi kpâm,tûi kpap gui lah. pînlê tûi k’êi k’ók ahlü ahngäî mcun thà ci gui. Khòmdek ah kkhân ah htantâ kphyá ngtàng gui cuh tûi ung ghìng om ci gui maih neh htantâ kphyá ngtàng gui lèng neh ami dí lo cuh hnguh hnging ah kya ci.Yùm mnài vai kya ca ni tu hngá ca tûilìnú gui cuh a müí hlá kä om neh a hngùn kä om ci tûilìnú kkâ mcìn hngün gui vai hlü ah mthong mhlat ci cuh a u ang?A cun ah akya lo cuh a khòtüî pèinglêng a thûshîn ah phäh ah kya ci.
A khòtüî pèingléng a thûshîn nak cuh lungkhò gui a dí damnak,shing ghing kkhúi tumat bäng géitnak,cíngcì im ung ka gui ung ka noh ghoh ah a kthú kshîn gui,ngá phâ nak ung dinamite pùng mkek nak lah sinite gui mang nak cuh tûi k’om gui shih kyuk hlak ca ngá phâ nì lam gui htung mang ah phäh ah om lo ca dídam nak cuh pinle tûilìnú gui ung gok lo ci. A cun ah amòòng amà gui ngkhái hleih mdáng nak on akhòtüî a ngtäp gui ung kchàng gui kbàn neh kkyákpok neh hmóngcàng gui ah phäh ah om lo ca a ngkhap ngtaih a ngtói gui cuh a tuhkbäih aktén ah kä hnguh tu láng pâng ah phih khòmdek khoh-tang gui ami mät ka vai ami htùngmang ah nìlam amshah ah phäh ah pînlê tûi kkâ mdek ah chüt hleih a khòtüî dídam nak ciah aphù kä khìn hnging ah vúk hnguh nak mi bùi chúm lo cuh kchàng gui noh hmat lo ci gui.
Kchòkhò ah phäh ah pyéin ah akya ung avan düt ung ahêi kä géit ah mtà bängbäng khàng neh géit ngah-tüh ba vai ah kya lo ci. A ghíng. gui cuh ahlü ahngäî ngcôngphyót neh ami phùng ghíng ung vah tumat lah tumat ah a ktheih pâi atüì hlìm ngshün ngphan ngdô ngpeh neh tumat noh tumat yîhngêi khai kya ci.Avaihlü ah mshíp phih om neh khtünggük phih neh aom ngcôngphyót ung mtà ung om ca mkyüt phih ghùng hnging khai kya ci. Avan düt noh mtà ghóng ami géit ah phäh. shè lo khapang netah kä ghàm pha neh kyu neh ngtäng neh thu ploih lo ci. Cuh kòn ah a cun ah mtà géit vai phäh khò gui a pùi kplut neh vo neh a lòng phlèng neh chuk ah phäh ah bùichúm lo vai ah she khai gui cun phih ngah-tüh vai kya lo ci.A cun ah phäh ah khò k’â pha ca thùikhò gui a kpú lo ung khò phih káng lo khai. Mêi k’ló a om lo ung phih mshih vai kä nghlôi lo ba khai kya ci.
Cun bäng ah kä kya neh ktùngshing nak vai phih kä om lo ba khai.A cun ah bungghàm yîhngêi ca kphyú kkhá, khìhlá,kchèi pâi gui phih kä om lo ba ung êi meh vai phih kä gah-tang lo bà vai kya ci.Tuhkbäih mi géitkò om ih gui mthong mhlah vai khai lo ci.Mi mthong mhlah khîn gui läí cuh tûikhong gui mhtéi ba vai.Khò gui ghàm khai thà ba vai kya lo ci.Khò vo phleng neh uyin gui kä bi en ba neh shing ghìng hei mdüih vü neh acun ah nglak gui ung kâphî, thòpat gui lah a hêi mang phya ci gui géit ah akya ung a kum tä hleih yoih tuk vai gui om lo khai.Mtà bäng géit ah akya ung kum kthùm ung khngät bäng coh ah kya netah mdek phih dí neh ghin ah lù púm cô neh kä êi mang hnging vai kya ci.A kum tä hleih gah-tang vai phih kya neh akhòtüî pèingléng mhtéi vai ah nì lam gui phih mtói hnging ah akya ung avan ah phäh ah nghlôi ngpán khai kya ci.
