Bä ciah Maurice lah a ng’htoi gui

AD 287 ung Roma ga k’kap gui no Eygypt kho a k’khan lam Thebes ung ka ga kap k’chin gui a k’daa a mi m’cut gui ah kya ci. A cun ah ga k’kap a k’thai gui a van cu Christian k’chang gui ah kya ci. Jarniva ah pei ah om ci gui ah Gout pakkhui k’chang gui a tuk gui vai ah Roma Mânggo ung ka no a mi tüih ah kya ci. A mi ng’tukah kä mi leng pha ung mü ah ng’tuk khai gui a van Roma Nat phaya a mi m’shuuk kyuk ah ci ne ca gok lo ciah kya ci. Thebes gak’kap gui cu a cun ah Roma Nat Phaya a mi m’shuuk kyuk tu vai ah dam ci gui ah kya ci. A cun ah a mi dam cu Roma gak’kap gui no ngami ah k’chü kä mi ng’ngaih tu hlü ah phäh ah Thebes gak’kap gui ung ka 10 Percent ngon gui vai ci ne me a mi ghü hlak gui ah kya ci. Ngami ah ng’ngaih cu a cun ah ci ah a kya ung k’poih ba ci no Roma Nat Phaya cu m’shuuk kyuk tu khai gui ci ne ng’ngai ci gui. Cun tu pang ah phih Thebes gak’kap gui ah Khanpughi ah khan ah a mi yum nak cu a kya ah khäng htek ciah kya hleih Roma ga k’kap gui ah a ci vai gui cu dí yop ciah kya ci. Roma Gak’kap gui no a k’hngih vei nak a cun ah me m’cha ne ci ba u hleih phih Thebes gak’kap gui ah yum nak cu kä ng’thong hlat ciah kya ci. Kei mi gui cu gak’kap gui ah ka mi kya ahlo ah Khanpughi ah cang ciah a na phan k’chang gui ah phih ka mi kya ci.

  Khanpuhgi ah läk vai ah a m’thei m’cäi lä kä mi nong hnging khai. K’poih ba ci gui läi na mi pyein gui cu ka mi ng’ngai khai ci ne pyein ci gui. Kei mi no gak’kap tumat nang mi ah kä ka mi lo hlak pha ge ung a cun ah ga k’kap cu Khanpughi ah maa ah ka mi ng’gun hlak püi ah kya ci ci ne pyein ci gui. Thebes gak’kap gui cu a cun ng’hlat ne a mi tuk tu ba gui ung phih a hei Christian k’chang gui ka vai phäh kä ng’hloi ne Roma Emperor ka vai phäh phih kä bä khai ci ne hmat püi ci gui ah kya hleih a mi nong gui ah kya ci. A cun ah kya hleih Roma gak’kap gui no  Thebes gak’kap gui a mi van a mi ngon gui yop ah kya ci.