Benevento Mânggo ung ka Bä caih Januarius ah ghünglu a mòng
Naples Mânggo k’chang gui ghung m’htei ciah Bä caih Januarius cu 3rd Century Diocletian a mang yah, Christian k’chang gui a mi kalu nak yah ung Beneban Mânggo ah Taigü Mâng ah kya ne bi bi ciah kya ci. Taigü khem Deacon k’hngih lah Christian k’chang k’hngih cu thong ung a mi chum ci ne ng’yak lo ne ngami gui thong ah hteit ne hnguh gui khai ah a m’lung phukpit ne hteit hleih a ni phih pha u ne taliksan gui am a mi m’bei hlü te taliksan gui no a ni cu kä ei ne a mi k’pyhin ah kya ci. A cun ah pyhong ne kya hleih a ni cu Puteoli ah khah püi ne a lu k’ke m’chünpit ne a mi ngon ah kya ci. A k’hngü a mi m’chünpit ah phäh ah lut lo ciah a shi gui cu tui ah ng’lat lo ne kya hleih a cun ung ka no tün ne Januarius cu a ming thang lo pihti ciah kya ci. Naples Mânggo ung om ciah Phaya kyawng ung a ni ah a shi m’kyang gui cu a mi htin ah kya ci.
A cun ah ngoiä chüt üm nak vai ah a shi m’kyan gui cu k’chang gui am khokumät ung k’thum vei a mi k’hnguh gui ah kya ci. A k’hmät Boiphaya no a cun ah shi m’kyang a mi ghon nak a ng’lat ah a ci ung a ni no Missa a gänap nak ah capit tui cu shi ah kya lo ci. Januarius ah shi m’kyang bäng ah kä kya hei cäicat nak gui awn a ni ah shi cu shi m’kyang ung ka no shi tui ah ng’hlat lo ci gui phih hnguh ci gui ah kya ci. Yum ci ah phäh ah a í cäicat nak m’yungaa gui a ng’dang vai kä hlü ah hlo ah kä yum ci ka gui ah phäh ah cäicat nak m’yungaa cu a k’daa hnguh ung phih m’lung ah ng’thong hlah vai kä loi ci.
