Shing m’kang k’tung ng’nän nak poi

Khãnmòpí-a kah kium lo ci-ah k’chàng-a Htá-ah kon-ah, a u phih Khãnmòpí-ah kä kài ci.  Moses nawh Hla-lái ah k’phiù a tai-a hlo-ah k’chàng-a htá phih, kiàng-ah kia khai.  Ani zùm ci phùng nawh a k’cùm-ah ghinnák gah khai. A mät-a htá k’pá tumat htá bäng hngo pe neh, sin-ah khàw m’dek cuh Khãnpùghí nawh m’hni ci. Ani zùm ci pang, kä dí-èin neh a k’cùm-ah ghinnák a gah vai-ah phäh-ah kia ci. A i-ah kia hleih ci-ung, khaw m’dek a m’cha m’làngnák vai-ah, a Htá cuh khaw m’dek-ah ’khãn-ah tüi lo ci-ah kä kia ci. M’Dek cuh, ani-awn phión vai-ah phäh-ah kia ci. Ani zùm ci cuh kä m’cha m’làng vai; ani kä zùm ci cuh m’cha m’làng püi-ah kia ci. Khãnpùghí-ah Htá k’pá cuh, kä zùm hleih néi m’cha m’làng gùi tah,  m’cha m’làng cuh sin-ah kia ci; a ’khãng cuh khaw m’dek-ung lo láng hleih k’chàng gùi nawh a k’hmüp vah, a ’khãng-a tah m’hni tu bà ci gùi; ami om kia kä ni hleih néi. A k’sé bi ci phùng nawh a ’khãng cuh, ú neh a ’khãng-ah kä lo ci.  A bi kä ng’dáng-èin vai-ah phäh-ah kia ci. A k’ní bi ci nawh Khãnpùghí-ung bi ci-ah kia neh a bi a ng’dáng vai-ah, a ’khãng-ung lo ci.