Do Thei Vai
K’chang-ah hngun ghün nak-ung ak’phän-ah k’thum-ah k’pai neh gah vai kia ci. Cun gui cuh k’hmo hta, hmo k’tho lah ng’vai ci neh hnguh hnging-ah kia ci. I kia hlieh ci-ung ak’hngih nak hngün cuh kä hmat-ung ak’thum nak kia ci-ah shih nak vai lam täng ng’et lo ca hngun ghün nak cuh do hnging vai cuh kä ng’hloi ba ci.Cun-ah ghü lo nak cuh kä do hnging-ung yei nak-awn ghün nak kä om hnging khai-ah kia ci.
A k’htük pi ghün-ah kia ca gai-ah-ung cuh k’tha gui be neh bi hnging yah kia neh m’chüt nak nän nak tumat ku ku aom lo-ung kamät-ah ng’chüi-ah phäh ka gah ci neh mät noh mät cuh m’tam nak gui om ci. Mät noh mät äp vai-ah yah-ah phih kia ci. Khanpughü äp nak cuh kyen yah ca phih kia ci. Khanpughü noh k’tha gui ana peit nak pang hngaw ng’ngaih khak nak gui om ci. Ng’thu theing-ung Khanpughü noh apyein cuh “Nangmi Kei-awn na mi ng’cha-ung i phih kä na mi näh khai .”ci ci. Cun a pyein hlü cuh I ng’nü phih kä na mi m’chüt khai a ci hlü-ah kia ci. A pi hta lei na m’chüt khai ci hngo neh kä pyein-ah kia ci. A va lo k’hläih pyein phung-ung ng’ghü ng’ghok tu ba hnging cun phih Khanpughü-ah ni bä nak-ah kia ci. Cun cuh gai yah ca hmo k’tho gui noh kä do thei ci gui-ah kia ci.
Khanpughü noh bi loh nak thei vai lah hteh nak vai lam cuh na m’shei pe gui pi ci. Mikmi noh m’lung k’hnga k’tha gui avan-awn mi ng’chüi vai cuh mikmi-ah ma mong-ah kia neh a ng’dang ya lo vai cuh Khanpughü-ah ma mong-ah kia ci. Hnguh hmat ca k’chang tumat noh apyein cuh “Na m’chüt hnging-ah ci-ah na k’tha nak vai. K’poih ba ci cuh Khanpughü-am ap neh yei kyai neh na om vai.” ci ci. Gai yah cun-ung k’tha yum neh m’lung m’däm nak hlüng yah ca kia ci. Khanpughü noh gai yah ci-am k’hma neh bi loh hlak neh amät cuh hngu-ah ng’shung neh ng’thup neh om ca kia ci.
A k’thum nak-ah ghü om nak cuh ng’vai lo, ghü lo nak-ah kia ci. Cun cuh m’thei m’htaih nak-ah ghün om nak-ah kia ci. Gai-ah-ung ka hlo-ah kei ci nak gui cuh maih lo khai. A gai-ah-ung abi man gui te cuh kä m’chüt la ba neh aäp vai a maih lo-ung Khanpughü lam täng-ah a ng’hlah lo vai-ah Khanpughü noh a bi-ah kia ci. Khanpughü-awn ng’et neh om nak cuh m’hngi lo neh yum nak cun phih däm lo khai-ah kia ci. Kei-awn nami ng’chah-ung i ng’nü kä nami ng’chüt khai a ci cuh ng’vai lo ci-ah k’chang gui noh hmat lo pi hti khai gui-ah kia ci. Ng’thawng hlah nak cuh hmat neh ghün om nak-ung Khanpughü-awn atäng-ah nami mät noh nami mät ap hnging neh om vä ci-ah ka pyein hlü ci.
