Ng’ngaih Nak
Ng’ngaih nak-awn ng’pak hleih puma tumat ka ning m’thein tu gui khai.Ca püi püi k’chang k’bä tumat om ci ami ci. Ani-ah lo neh ng’thei lo tu ca k’chang gui cuh da ci ami ci. Kho kum k’da ng’thei lo tu ci-ah chang gui-ah akia-ung saya-ah kya hnging khai lah kä cun ghü neh tüi ba gui htei ci. Kho k’hngüp ät-ah kia lo hleih am’thei-ah k’chang tumat cuh saya-ah kä kya hning lah a kya hnging cuh cam neh tüi ci.Kho kum k’hli k’hma ng’pyi lo hleih cun-ah k’chang cuh a saya-ah lo ba ci. A saya-ah om nak-ah im k’kyong-ah kä luh pha-ung ang’bün-ah lu chüm lah kho dawk cuh k’pung-ah m’shün ghüt neh va lut ci. Kyong-ah agok vai-am tah a saya cuh shum chuk neh ng’hta püi ci. Ne tah saya-ah ka kya chin-ah mong pyein lo khai ci neh ng’ngai gep ci. A saya ng’vai noh m’kha ät ng’sik ci. Na yah-ung i-ng na lo püi? A ni noh kho dawk lah lu chüm ci neh m’shang ci. Cun goi cuh ahawi na tha ci neh ng’shik ci. Im k’dü ma-ah ci neh pyein ci. A saya noh “ Na lu chüm cuh na kho dawk-ah hawn täng-ah-ang na tha” ci neh ng’shi ba hleih achang hta cuh ng’ngah tüh chit ci. Cun cuh teng neh a saya noh “Nang saya-ah na kya tu vai kä na chin pha ci” ci neh m’shang ba ci. “Nang-ung ng’ngaih nak, ng’shüm nak kä om pha ci” ci neh pyein ci.
Shin-ah puma lei cuh ng’ngaih nak-ah hlü-ah mong cuh ning m’thein tu gui hlü-ah kia ci.
Cung kon-ah mik k’hmü-ah khong -ah mong ka ning m’thein tu gui khai.
Ca püi püi Sayataw tumat om ci. A ni-ah khong nak-ah kho cun phih ng’shong neh k’tai güboi gui phih k’da om ci. Kho k’hngüp ät-ung k’tai güboi tumat-ung ka noh ng’thu cü k’she ng’ya neh sayataw cuh am’lung kä ni ci. Cun-ah k’tai güboi cuh k’tai gü-awn kä täng-ein hleih om ip, ei awk neh kia ci. Cun-h hlo-ah ashäng shäng ng’ya lo neh hteit neh hnguk ci. Ne tah apyein cuh “nang k’taigüboi Boi yeisu noh apyein om ci.” “Cun cuh am’dah noh am’dah-am lam am’shüm-ung ani nik k’hngih ghem-ah ng’kyak khai goi .” ci-ah apyein. K’tai güboi noh “ä hman ci. Cun te lam m’shüm hlak ci cuh gu ge hleih a ca kia ci.” ci neh m’shang ba ci. Sayataw noh cein-ah tah kaa taba ci om ci. Am’dah noh am’dah lam am’shüm hlak-ah tah k’chang k’ni noh k’di-am lam ashüm hlak cuh kaa tuba ci. Ci neh pyein ne tah nang cuh ng’thei ng’tham nak gui phih ak’da na ng’thei ng’tham pi ci, i kä hmat ci gui-am lam na m’shüm hlak gui khai ma,na mät noh lam na m’shüm gui khai ma?” ci neh m’cäi ci. Shin lei cuh na hmat na bi vai, na bi na hmat vai ci-ah ng’thu-awn ng’pak ca kia ci.
