Pahta mòòng nghtàngkònak
Pahta gui nghtàngkò lo ung nghlôi ngpán khai nghtàngkò vai hlü ci.Tuhkbäih cuh Kchò Thùng yùmnak mi teng shüm ko.Kchò gui cuh khò päng yùm ci gui ah kya neh akcùm ah mghû ngthâ ci gui. A lòngthà phäh phäh ah om ca khòmhtûng gui ngäng ca khòghun gui chü neh ktàigü mghûngthâ ci gui. Avai hlü ah pyéin ung khmòngthà a hlíp täng ah om ci gui noh pànmhtûng ghùng ca pànkhò chü ci gui.Pùghí mhtûng k’et neh om ci gui noh Pùghí mhtûng ghùng ca khò chü neh ktàigü ci gui. Kchò gui cuh vá Yò Mvákhò ah ami om yah ung a ngmìng tháng ca Ngànpá Mhtûng chü ci gui. Ami chü béit bäng ah kä kya neh khòmhtûng gui ah ng’äî ci hngô neh mcu ci gui.Kchòkhò ah a ngmìng tháng ca Khòmgìm Mhtûng on ani ngtuk hngô ah pyéin neh ng’äì ci gui.Ngànpá Mhtûng cuh ngokngôi chütah Khòmgìm noh a leh ngôi ah pyéin neh acun ah phäh ah ng’äî cuh”Khòmgìm no ka nglòilo khai ci hleihmang hngan kphâ ngäi. Ktò kshé noh ka mhlethlèi khai ngngài hleihmang hngan kphâ ngäi.Lo khai ci hleihnglòi yu kchüng nehmâng hngan kphâ ngäi. Hlèi khai ngngài hleihka mhlet ghêim nehmâng hngan kphâ ngäi.
”Khòmgìm mhtûng no phih a ng’äî tu ba cuh”Mhtûngtông Ngànpá a mvùi kyu hleih yu vù lo ngäi.Gètò vaikoa mhlet ghèim nehyu vu lo ngäi. A mvúi kyu hleihmshíng lim kkhî ahyu vù lo ngäi. A nghlê gä hleihgòtòi nglak amyu vû lo ngäi.Mhtûng gui ah ng’äî gui ami ng’äî läí cuh a i hlok ah khòmhtûng ghùng ca khò gui ami yùm ngdáng ci.Ami mghûngthâ ktàigü lo ung phih ami khòghun gui chü neh ami ktàigü gui om ci. Mòpí lah Yátài mhtûng pèi ah om ci gui noh khò a â lo khmà ung ami ktàigü cuh”Nú Mòpí ona hlûi ngkyìnghlút ba ä. Pá Yátài ona hlá ng’ài lók bà ä.Mhtûng ngmèi ahnglìm ä. Khtê kpân ah nglók ä.Khòmik htí äkchahmâi htaih ä.Hlò ä ngshü ä. Hmundìng yu shü ä. Dó Yò yu kkhâng ä.Ka ngthû na cùng ä. Ka mgòng na ngngài ä.Khò o shèn ä.
”Khò a â lo khmà ung phih ami ktàigü cuh”Na khnìmik ah yu htí ba ä.”‘Na khngìmik ahyu htí ba ä.Na kchâ hmâi ahyu htaih ba ä.Mhtûng ah nglìm ä. Khtê kpâ ah nglók ä.Kbügüt yu mthùm ba ä. Hlá mhngaih yu mshaìbà ä. Güngkhù mthùm äBàng ktâ mshài ä.Khò â aih neh a hngüp lo ungPlùi Kkhânpúghí ona khnìmik yu mdáng lo äKa kói mkyéika kyännak vaina khngìmik yu mdáng lo.”Mghû ngthâ neh ami ktàigü lo ung khò chü neh ktàigü te ci gui cuh aktúng pí ah ghin om nak vai akya lo ung Kkhânpúghí ami chü cuh hnguh hnging ah kya ci. A ngmìng tháng pí ci läí cuh kdúmàlung mshòng neh hlèi gô ci noh Kkhânpùghí chü neh êi a ngyoih ung kya lo tu kcàng ci cuh avan noh ami ngak ah kya ci.Aktôi ah ami ktàigü pyéin ung ”Kkhânpùghí opüm ùm na yu mkyum lo äHtàng k’am na yu kchák lo ä”
