Shäm lah Khoh
Nang noh kä na chah hnging cuh nang noh na shäm-ah kä kia ci. Nang ning shäm ca kia ci.(Iven Ball)
Boi yeisu noh Maria Magdalene-am apyein cuh kä na tawn-ein cang -ä . Kei cuh ka pa Khanpughü-ah kä heit ba pha ci. Ka Pa Khanpughü, nang mi-ah phih Pa Khanpughü-ah om nak-ah ka khi ba vai mong cuh hteit neh m’thein gui-ä.(Jn 20:17)
Kho k’hngüp ät-ung nu tumat noh ahta k’hmo hta cuh ca ang’thei ng’thang tu vai-ah aom nak-ung ka noh hlaak ca pigo tumat-ah hteit neh m’om tu ci. Cun-ah ahta cuh ang’thei ng’thang ahmat tu vai ang’yak hlü-ah phäh-ah am’om tu kia neh k’hngät phih käng’cha pha man ca ng’nu ng’hta goi cuh ani mik tui ng’kia lo hleih ng’pai ci goi. Cun-ah m’hngi yei nak lang neh anong cuh ni ca nong nak-ah kia neh ni k’ca m’hngi nak-ah phih kia ci.
M’va thum-ung ng’thu tumat om ci. Hta gui m’hngi gui-ah kiak-ung k’hlang-ah nong gui vai ci-ah om ci. Pyein hlü cuh mät-ah hta k’hmo gui ami hnguh hmat tu vai, ami ng’yäk ng’chan tu vai ng’yak hlü-ah kiak-un ling gai vai hlü ci. Ka hta ka m’hngi ci ci neh pei cheng geng-ah m’om gui-ung ngami cuh m’hngi gui-ah kä kia ci.Nong gui ci cuh ngami ni ca ng’bum ng’htoi nak gui-ung tüih tu vai-ah kia ci. Vai hlü-ung ka bung-ah om neh kho lo ma mong mah nu pa gui noh ami hta cuh mango gui-ung ami tüi tu vai cuh kä mi ng’gün vai. A m’shah nu pa gui noh ami hta k’hmo gui m’hngi yei nak ci u neh ami pei hta, ami hnguh nak vai-ung m’om gui neh ami kho lo ma mong gui bäng bi hlak ci gui. A ngoi-ah ng’thei ng’tham ci lah kä cuntu ng’cha lo ci. K’chang lah ui, ai, vok, me -ah ng’cha nak cuh k’chang-ung ng’ngah tüh nak thei-ah k’chawk cuh om ci-ah kia ci.
Ca guk chang U Aung Thin noh, “hla k’chi cuh k’chang gui-ah tah dong gai tu ba lang hleih phih bung k’hteit k’chang gui-ah ei vai kia ci.Nga cuh k’chang gui-ah tah tui ng’lok tuba thei lang hleih k’chang gui noh pha neh ei ci gui. M’vui cuh k’chnag -ah tah gai ghang tu ba pang hleih phih k’chang gui noh phan ci gui.”
Cun gui cuh hnguh hmat ci lah kä cun-ah ng’cha nak-ah kia ci.
Ng’thei ng’tham ci lah hnguh hmat ci cuh kä ci.
Am’shah nu pa gui noh ami hta hmo gui kä mi ng’thei ng’tham tu hlak gui hlü cuh ng’thei ng’tham ca k’chang m’shah gui-ah om-ah phäh kia ci. Ng’thei ng’tham hngu hmat ca k’chang tumat-ah kia vai cuh saya gui, nupa gui-ah hmo mät cun phih ang’thei ng’tham tu hlü vai hlü ci. Ng’thei ng’tham hnguh hmat nak-awn pu ghü noh go im a cawh-ah kia-ung, pa noh k’pe im,
Mät-ah kut-ung uk im cawh hnging-ung vah ng’shon cuh ng’chüih khai. Yu kat vü lei lei-ung tah k’hngu-ah maih vai.
Nang noh kä na chah hnging cuh nang noh na shäm-ah kä kia ci. Nang ning shäm ca kia ci.
Nong nak-awn ng’pak hleih ng’mü m’cha lam täng mi teng ba shüm ko. Kho m’dek khan-ah nong gui cuh ngoi-ah ka vai sho tawn-ah kia ci.
Ca püi püi ng’büh ng’mang ca ng’vai k’chang tumat cuh bung-ah om neh shuh shang ca k’chang k’bä-ah om nak-ah gok lo ci. Cun-ah chnag k’bä noh do chang neh k’kyong-ah k’hmoh tu hleih ani cuh bung-ah kah phung-ung kä om tu man ca kia neh ang’nam kä nep ci. Cun -ah k’chang k’bä-ah om k’ih, ei k’awk gui cuh teng neh nang lah kei cuh k’ka lah k’khan-ah ni ghün om nak ng’chak kha gäng ci ci neh pyein neh tah kei-ung avan om ci. Cun te nang-ung i phih kä om na maw ci hleih cun-ah k’chang k’bä noh acun ä, nik ni cuh ni ng’lah hlak ci, I kia hleih ci-ung nang-ung i kä om cuh avan om ca na ng’ngai ci. Kei cuh i kä om tu pang-ah phih avan om ci ci-ah ka äp ci ci neh pyein tu ba ci.
Ngui ghui kä ng’ya hlü ca k’chang-ah phäh-ah ngui ghui noh vuuk nak kä pe hnging khai. Ng’ya hlü ca k’chang ka vai lei cuh ngui ghui-ah phan nak-ah bong bai neh ng’phyui ghüi khai. Cun-ah hlo-ah kyom hlü ca k’chang cuh kyom htang nak gui cuh shui lei neh cun-ah kyom htang nak-ah phan-ah om khai. A caw kia hleih tuh chü ng’bi ng’loh nah pyang ca k’chang gui ng’büh neh tai ci gui.
Na mi teng ca püi po gui noh na mi ng’ngah tüh vai cuh “Ng’tüi om ba vai kä k’tha nak ci cuh a shih vai-ah k’tha nak ci.”
The person who is not busy being born is busy dying.(Bob Dylan)
