K’KYONG KHUI NG’GEN NG’HTET NAK
Caw ng’ming nak ci-ah k’pami lah Ami ng’ming nak ca k’hngumi cuh ng’chu ng’la goi kia ci. Ngani cuh ng’gen tu hloi ci-ah ng’chung’la goi-ah phih kia ci. Kho k’hngüp ät-ung ani ng’tuk nak ba-ung Caw noh Ami-ah baan k’pheim, cun m’tui tu pek ca ateih püi Mary noh Ami-ah na cei nong-ein-ä ci neh pyein ci. Ngani ani ng’khah nak lei cuh kum k’thum lo püi ca kia ci. Ani ng’khah htük kum lei cuh yei kyai neh ng’khawt ca k’kyong khui cuh säm ci goi te. Caw cuh kä ni ca hngu lam om tu lang hleih phih Khanpughü ayum lo tu kon-ah ni lo hleih Ami-awn ng’khah ci goi-ah kia ci. Ami cuh k’pami hta-ah a hta yah-ung Caw cuh abi vai ma mong kä om ba neh k’yong khui k’kyong-ung vuuh nak om lo ci.
Caw cuh ateih püi gui-awn k’pung-ah ng’hle neh ei awk k’tat neh akia nak gui-awn kho k’hngüp cuh m’di lo ci. Bi vai ma mong gui a shui tu cun phih kä ng’hloi ci. A cum-ah am’lung cuh sek ca kia ci. A k’chu noh k’tha neh bi abi-ung phih Caw-ah phäh cuh m’lung a sheit nak vai gui bäng vai hlü-ah kia lo ci. Ani k’kyong khui-ung vagah kyen lo neh hei mang da lo hleih Ami cuh ahta k’hmo k’shäm-am m’äp neh agah-ah ma mong bi ci. Caw noh cun hnguh neh kä k’hngumi man na hta hngo kä na shäm hloit ci, ci neh k’she nak ci. Kho k’hngüp ät-ung Caw cuh awk k’tat neh lo ba neh a k’chu cuh a ng’tuk püi-ung Ami-ah baan cuh hnget ci. Cun cuh Caw mät noh shei im-ah khah püi neh, a guih-ah ka ning ci-ak kä kia ci, shei bawi-am ak’cang kä m’thein-ein to ci neh ng’hui na laih laih ci. Ami noh phih Caw cuh m’hngi yum ba yah ca kia neh ka mät-ah ng’tän-ei ci neh hle tu püi ci. Cun te kä sho pha hleih ng’gen lo ba ni neh Ami cuh dong ba hlü ci. Kä bä khai, ka cei kä om-ung ka hta i hlok cha ka m’htei khai ci neh ng’ngai ci.
Kä sho pha hleih Caw cuh ei awk k’tat neh im-ah lo ba neh k’chu phih tu that neh ahta phih k’beh ci. A k’hmo kyap hleih k’pom-ei neh Ami cuh a teih püi-ah im-ah dong ci. Caw noh got lo tu lang hleih phih ami k’pyu k’kyong-ah ng’thup tu ci. Ami cuh ng’bum im-ah om ca Mary ng’ming nak ca k’chang-ah om tu ci. Acun-ung om ca tamasaya ng’vai noh ng’chu ng’la goi ng’khah yah-ung m’cu te-ah k’chü khän cuh m’thein ba neh cun -ah k’chü khän cuh Caw noh gäi ca akia-ah mong cuh pyein ci.Cun gui cuh Ami-ah hma-ah kä kyak-ah mong cuh m’thei u neh, ng’khah yah-ung k’chü khän gui cuh ng’chu ng’la goi ani ni k’hngih noh ani m’khän vai ahlü-ah mong cuh tamasa ng’vai noh m’thei ci.
Ami cuh yumtu ng’bum-ah gung nak tu-awn abi loh gah tang ng’hloi hleih om tu ci. Kho k’hngüp ät-ung a cei Caw noh phone chü lo hleih cäi ci. Ami a cei-ah htei ba chin-e-ang?
From Catholic version
