Yùm ci ktû khmó hta gui lah kchò thùng
Yùm ci ktû khmó htá gui am ca,ng’äî.nglâm.tum kkhôn mthêi ci gui cuh Mvá Kchî,Mvá ng’äî,Mvá nglâm lah akhòhêi ah tum kkhôn gui mthêi shàn ci gui.Akchàng ah pyéin ung Kchòkhò ah om ca kchàng gui cuh Kchò Kchàng gui ah vah kya hleih Kchò thùng lam on vah mthêi khîn ah kya ci.Tum kkhôn teng lo ba ah akya ung guitar tum neh mthéi shàn ci gui.Kchò thùng ah tum kkhôn gui cuh khitkhotkhet,phìphät,pìngpäng,chìngchong,kphyùmg,mgòng pùlòi,hngá pulòi,môngchà,khtìng kbèi gui ah kya ci.Cun gui cuh akhmó htá gui noh lûmpyân yèikyài neh ami hmat yät nak ah kya ci.Cung phih pùlòi lah khtìng kbèi läí cuh a ngvái gui noh ami mang ah kya ci.Akhmó yah ung khitkhotkhet tum thêi ci noh khtìng kbèi cuh ashäng tum thêi ci.Catholic htahtana cuh kchàng pakkhúi gui ah thúngyò mhtéi vai ah mthêi netah acun ah thùngyò lah RC yùmnák cuh nghlôi neh ng’an khai mkyúmnak(Inculturation)bi vai ci ci.Cun ah kya hleih RC akhmó hta gui am tum kkhón mthêi lo ung ayan Kchò khmó gui noh ami lûm pyannak on ami tum lo thêi ah hlô ah ami tum lo thêi vai mthêi ba gui vai ah kya ci.
Acun ah ci nak on tum thêi ci gui maih lo ghepghep ca kchò pakkhúi cuh htahtana ah yùmnak on mkhän ba ah phih kya khai.Acun ah chükmaih lo ghepghep ca Kchò thùngyò acòyàh kyawng ung mkhän ba vai ah akhmó htá gui noh ngthêi neh ng’äî neh tum neh ami läk vai ng’äî ka mthêi gui ci.Cun ah ngäî htá läí cuh khtìng kbèi k’ó on ami ng’äî vai ka guk ah kya ci.Ng’äî läî cuh”Khitkhitkhet khitkhotkhetkbèi tu vai ah ngthêinak ma.Khitkhotkhet khitkhotkhet nät neh nät neh mi nglàm ko.Khtìng tum püngkhtìng tum püngÙm kkok tum neh ngthêinak màKhtìngtumpüng khtìngtumpüng ngpet neh ngpet neh mi nglàm ko.Chìngchòngchengchìngchòngchengngshé kchét vai ah ngthêinak maChìngchòngchengchìngchòngchengkhléng neh khléng neh mi nglàm ko.”Acun kchò khtìng kbèi k’ó on cä tün neh kchò khmó hta gui noh ami ng’äî gui om ci.Acun gui ung kah tumat cuh Dâihtum khòkhò ng’äî ”Na nunu hoi hteit ci?Dâihtum khòkhò yòng ei ci.Na papa hoi hteit ci?Dâihtum khòkhò yòng ei ci.I mä i mä ning mshó ghüt ci?Kkhágè nglung ät na mshó ghüt ci.Cun na êi yop ung i eì bà khai?Phyüt htá ne vah êi vai kyai.
Nú ni pá ni mä i yah ung lo ba khai gui?Mlòng kthà buh a hngin kòn ahkbâ lèlôi a kyêim kòn ahlo ba khai gui”Cun kòn ah nú hoi hteit ci pùmá ng’äî ung phih mi hngu hnging ci.”Nú hoi hteit ci?Pìshing shùi ci.Pìshing i vai?Kphyú goh nak vai.Kphyú cu i vai?Kkòi (khmák)am mbêi vai.Kkòi i hô ci?Nglínhtá shep ci.Nglìn a i vai?Khò vòk nak vai.Khò cuh i vai?Htàng phû nak vai.Htàng cuh i vai?Nglóng tôi nak vai.Nglóng cuh i vai?Htá lák nak vai.Htá cuh i va?Htá lo kpät khai.Cun mä i on na kyìkyôm khai?Ài hlùi phäí on ka kyìkyôn khai.Cun mä na gím(ták) tu ci ang?Phakkhùi kkyòng ah yu teng ä.Kä om ci cuh i yah.Mhtak àishón ung hngang teng ä.Kä om ci cu i ah.Pu kkhin ngjlùi noh pah lo ktoih neh ngbàn ah pám ah a yôn ei.Cun mä na chìchán tu ba.Tûilìkhùi ah a luh èi.Cun mä na khìkhûi tu ba.Ka khngí ngshüí ko ci en neh.Khngì ung na phìphô en vai.Ka khngí gòm ko ci en neh.Kpyüm on na chìchûi en vai.Ka kpyüm pún ko ci en neh.Kták ung na ktì ktah en vai.Ka kták ngkéng ko ci en neh.Ngplung ung na ktìktûn en vai.Ka ngplung hlò ko ci en neh.Tûi on na mhlìmhlón en vai.Tûi hngâ kòi ei khai cu.”Shin ah pùmá ng’äî cuhu noh kä mcu ba hleih maih lo te ci.Cung phih shùilèi neh ka mthêimtháng bà ah kphêiacòyah kyawng ung phih kyai,htahtana ung phih kyaithùngyò hnguh hmat nak ung nî bä nak gui na pe ciah kya ci.
