Pâhtâ mòòng nghtàngkònak
Pâhtâ mòòng nghtángkò nak hnging vai ponghtêi ngpyângngthàm nak gui ung mi mät pâhtâ kchàng gui ah nglùng ah mà neh pyântham ba vai cuh aktúng pí ah kya ci. Ayan om màn ah ngnéng ah om neh ngah-tüh nghtàngkò cuh u noh i khmà ah phih kä hlûitä ci. U noh kä hlûitä kä bi hlü bi hnging neh mdáng neh kyäpkyäp ah om cuh kchàng gui mà neh ngthong nghlat hlak ci. Avai hlü ah Kkhòilung pìgò cuh Kchòkhò avan ung RC mà kbäih neh yùm lo htük ci gui.Kyün khngüp tä hleih ngbûm u neh phàyà kyawng hteit ci.Cun ung phih lam pèi ah pm ca a hlùn pah ah ngphuh hngün cuh bungkhahlok ci.Akcàng ah RC noh a mthêinak ung mcìn hngün cuh ngbûng im phàyà kyawng a ngpyî ung akhngih nak ah htíthéing ca kyawng ah mthêi ci. Cung phih pâhtâ kchàng gui cuh mcìn hngün kä k’hlêi neh kyih ci gui.K’hlêikhlàn neh kchìngkhlèi kyómhtàng khai i hngô kchà pyân vai kä hmat ci gui. Khòilung pìgò Shingkhòi k’hláng ung om ca mcìnhngün púi läi cuh htehnak ah lam hngô kä om ba ci.Cuh cuh ùyîn bi neh mcìmhngün ah phèilàng ung om lo ci gui noh ami ùyîn a ngshông vai lam khai neh mtà géit neh ngùi ami gah vai bäng teng ci gui.
Cun gui cuh u gui ang ci ung tamah saya,bóiphàyà,màmah gui ah phäí na gui ah kya ci.A kkhân kphòng ah yùm neh RC ah mthêi mcäì kä läk cuh u phih kä ngthongnghlat hlak ci. A cun gui lèng neh pyân ba vai cuh kà ca phih kä kya ci.Akdá pyéin en neh mà neh mcìn hngün ka k’hlêi ci.Acun ah k’hlêi ang hleih cäí ci gui. A i ah kya hleih ci ung mcìnhngün cuh November akshì gui ah pòi a om lo ung vah k’hlêi man ci ci gui.Cung phih RC noh a mthêinak ung shi ci gui cuh ami ngmùimchà mhtèikhò mêi ah akdá pí ah gok ci.Ngamí ka vai suhshân ktàigü ah akya ung,bùi òt ah gôigê,mneh m’oh gui avan ami lòt lo vai gän àp péit gui ung lòt lo u neh na gung tu ba cj gui. Kä mi lòt lo phâ ung phih na gung tu ba gui ci gui ciah ana mthêi gui cuhakcàng ah bi neh kä mi mdáng ci.Acun ah lam k’hlêi neh pyàng neh k’hlêi mdon neh mcìn hngün ung kchèi pâi gui géit neh ci ung pâhtâ kchàng gui cuh akya ah yèi neh hteit ci gui.Akkhân ah lam kcoh däm hngan nong ci gui.Pâhtâ yùmnak ci cuh yùm ah ciah bi neh mdáng ah kya ci. Acun ah bi neh tah pâhtâ mòòng nghtàngkò lo ung bî cuh pyéin ah akya ung hngu tu neh yùm tu khai kya ci. Khòmdek ah kkhân ah pâhtâ yùmnak akkhak om ci.
Cun tu pang ah phih dá tu pí neh yat tu pí ci cuh christian pahta ah kya ci.A i ah kya hleih ci gui ung Bói Jesu no bi neh mdáng ca kya ci. Pâhtâ mòòng nghtàngkò lo ung mät ah yùm pyéin neh cun ah pyéin cuh a i ah bi mdáng neh ci ung vah hngu tu neh yùm tu khai ah kya ci.Mônkhò Mawlamyâing ah htâhtanâ bi ka yu bi tu yah ung phih Kkhòilung ung pâhtâ kchàng gui ah hlô bä ah kya tu ci gui.Acun ung om ca Bóiphàyà Stanis cuh ghí lo neh akya ah ktàigü ci.Mawlamyâing ung cuh Hindu,Budha,Islam,Christian pahta yúm ci gui cuh ngcôngphyót neh om ci gui.Acun ah nglùng ah RC cuh phàyà kyawng a hteh ung kpé ngtän bäbä ung mkhuk dòng neh ngoh neh ngdüí neh ktàigü ci.Acun cuh Bóiphàyà noh a mthong mhlah hlü ah phäh ah ahêi pâhtâ gui ah hlô ah kpékhung ngtän gui kä thà en ba ne avan ah hä neh ngshông khai pyàng ciAcun kä yùm ca pâhtâ kchàng gui cuh phàyà kyawng kä hteit ba ci gui. Acun ung kei noh hteit neh mghó gui k’hlêi neh bìkbôi gui kä gählêi ci.
Acun ah a hngan péi ah akyih kshé ah bung ca ayan phäihtá gui no ami om nak man om ci. Acun cuh htaih khai k’hlêi neh hmôn ni,panshì ni,êi ók vai gui géit neh ni tu hngá khai om lo ang hleih pahta kchàng gui cuh yùm lo tu ci gui. Acun ung ka géit ah panshi hngah,hmôn hngah gui cuh hindu gui noh k’hleih lo hti ci gui. Ngami cuh ami pòi gui ung hmôn hngah ung buh èi ci gui.Ngami cuh kchàng kbä(ဇာတ်မြင့်)lah kchàng kdüm(ဇာတ်နိမ့်)ci neh mkhôimcha u netah tumat ah êi nak ah pàkan dòn ung tumat no kä èi tu ci.Hmôn hngah ung èi u neh ami êi yop lah ghot ci gui.Acun ah ami êinak ah hmôn cuh kêi ah ami khlèih lo yah ung kä yòi èn dŭt neh nggèingkhot vai ah nghtàngkò püî gui cang netah pâhtâ mòòng mthêin tu gui ah akya ung ngngài tu ci gui ah kya ci.Acun ah kum kphlì nghnguh nghmat nghtàngkò püî gui neh ka om yah ung pahta hêi ung ka noh RC yùm lo tu ci cuh 27 lo ci. Phàyà kyawng kä lo ba ci gui phih kài lo tu ba ci gui.Acun ah bi neh mdáng neh nghtángkò püî gui ah akya ung ami khngà mcûn neh ngngài tu ci gui ah kya ci. Lô kä bi ung a mghó ah hlô ah pâhtâ yùmnak cun phih htaih khai kyóm khai khlêi neh pyêin vai hlü ci cuh mi hngu hnging ci. Kä cun läí ung mghû ngthâ netah shi ca pùghí pìghí gui ah guh k’am ami thà nak ah lung mshôn gui a bung ah hlô ah RC ngphün cun phih täng tu düt khai kya ci.
