Bä ciah John Vianney ah ghünlu a mòng

Bä ciah John Vianney cu Christu kum 1786, May k’cha 8 hngüp ung Pyinhtit ghunkhaw dardily Mânggo ung duyai k’kyawng khui ung ka no ng’tüi ciah kya ci. A khokum 20 ung Lyons Mânggo ung om ciah Seminary ung htei tu ci. A cun ung a ng’thei ng’thang tu gui a m’shah cu kä m’chüt näng nak buiawt ciah kya ci. Ngami gui uk gui ciah Boipahaya a ng’vai no a hteih ba vai ng’yak hlü ciah pyein hleih ne kya hleih Taigü Mâng no a pyein cu yumtu ng’bum no hnguh hmat k’chang gui a ng’yak hlü ah hlo ah htitheing ci gui phih nga pi hleih ng’yak hlü ci ci ne m’shang ba ci. Christu kum 1851 ung John Vianney cu Taigü Boi ah a kya lo tu kon ah k’chang 230 bäng va om ci ah a kya ah hlak ciah pigo ah kya ciah Ars Taigü khaw ah a mi tüih ah kya ci.

A ni cu läklam gui awn a kya ah kyünhloi ne a ni ah lo ne kat nak phleh lo ci gui ah kat nak pyhei nak gui cu a mät no phih bi pe gui ciah Boiphaya tumat ah a ng’ming thang lo ciah kya ci. A ni cu kat phleh ci gui ka vai 14 nayi ngoh peit gui ne a k’hmo hta gui am phih ng’thu k’ni m’thei gui ci. A ni cu k’chang gui k’nga k’phang nak lah k’chang gui ah k’khan ah k’chü m’gein ne ng’ngaih tu peit nak ung k’chang a daa no yum ngak ne m’nai ci gui ah kya ci. K’chang gui ah m’lung kyawng ah om ci gui a í phih hmat ciah hnguh hmat nak cu a k’tüi yah ge ung om ciah kya ci. Ng’mü m’cha lam ah lam m’shüm nak k’nga k’phlang nak a mi gah vai ah k’chang a k’daa cu a ni hnguh lo hti ci gui ah kya ci. Christu kum 1830 ung ka no leng ne khokum ghalei k’hma ung a ni lo ne hnguh lo hti ci gui ah k’chang k’shing cu a k’hngüp täi hleih k’chang shing 300 khei hti ciah kya ci.

  Christu kum 1824 ung ka no leng ne a she k’ka ah toktap nak gah ne a cun ung ka no khokum 30 a chüt hleih a cun biawt ciah kya ci. A k’shek’ka gui ah kyühkyok vai ah k’o gui, a kyä ung hlokyan nak gui gah ne im kyawng ah om ci gui phih mei no a uih ah tumat a ng’pi ung tumat cu gok lo ba hleih toktap nak buiawt ciah kya ci. Ars Taigü kho ung om cia gui ah Boiphaya gui no phih John Vianney cu a mi kalu nak ah kya ci. Ngami no a ni am a í kä hmat ne hmat ciah ng’shei ci ci ne pyein nak ci gui. Boiphaya gui no khokum ät ung hmät a mi bi ah Annual Retreat ung Boiphaya tumat no a ni am a k’guu ci ne a peit tu ah kya ci. Taigü Mâng no pyein ne kei ah Boipaya gui ung täng ciah guu nak tumat hti ah om ciah ka hnguh ci ci ne m’shang tub a ci.

Bä ciah John Vianney ung k’chang gui ah k’khan ah m’hngi nak gui cu hnguh vai ah kya ci. Pyinhtit k’chang gui no a ni cu a kya ah yum m’nai u ne yei nak ci gui ah kya ci.Christu kum 1852 ung Taigü Mâng khem ciah Monsingor ah a kya lo yah ung a ni no a hlui ah htinkan kah Chalice kot cu yoi ne duyai k’chang gui am pe ciah kya ci. Kä gai ci gui a ni ah m’htei m’hta nak awn gai ba ci gui. A ni m’nai tu u ne a mi peit ah Crusu lah däm tub a ciah Taigü kho ung a ngoh vai ah a mi pyein cun phih maa ciah kya ci. A ni cu Taigü Boi gui ghung m’htei ciah Bä ciah k’chang tumat ah kya ci.