A K’SHE K’KA GUI BUI CA K’HMO HTA GUI GUNG TU VAI MONG
Pingola kho, potkata pigo-ung kasi ci-ah ng’ming nak ca kho kum k’chüh lo pha ca k’hmo hta tumat om ci. A ni cuh tamah saya-ah hta-ah kia neh a päi hta k’phli, apai hta k’phli om ci. Cun-ah k’hmo hta cuh kyong khai lo tu thai ca kia neh a teih püi gui-awn phih ng’khot ng’gei neh kyong-ah phih ca hmat ma ca kia ci. Im-ah a lo ba-ung phih anu ei shon tu püi neh ng’khai ca k’hmo hta-ah kia ci.
Kho k’hngüp ät-ung apa lah pigo k’kyong ng’vai chang gui ami ng’ge hti cuh hnguh gui neh hmat lo tu hlü lang hleih phih u noh kä m’thein tu ci. Müt kia lo hleih apäi hta noh kasi-aw k’seng neh let lo bung hngu-ah dong neh ng’thuh vai ci neh m’tho ci. Ne tah ami k’kyong khui k’chang van cuh dong ci gui. Ami dong yah-ung hle hnget-ah kyek gui cuh ng’yak ci gui. Caw ami dong yah-ung va ng’hlat ba hleih a hngei k’kyong khui k’chang gui cun phih dong lo tu u hleih hnguh ci. Cun yah-ung ngami-ung kah k’pa mi hta tumat cuh hlehnget noh k’cuh hleih ng’täng neh a shih cuh hnguh ci.
A ngong cituh kia lo hleih kasi ni k’kyong lah a hngei k’kyong khui k’phli cuh m’cu lo-ah kasi-ah pa noh khong mang hleih m’gho gui-awn phung tu neh om ci gui. Cun-ah sih ghüt ca k’hmo-ah mong u noh phih kä pyein ci. Kasi mät noh phih a k’hmih vai k’tha nak ci. Pa tumat noh cuntah a hta gui-am ami nu a sih kä m’thein gui neh a hngei pigo-ah hteit ci ci neh m’thein gui ci. Cun-ah Kasi-ah pa noh suh shan nak, Khanpughü m’tam khah nak, ng’thu k’theing phat nak gui-awn van cuh khong mang gui ci. Bung hngu-ah ami om yah-ung ak’hmat m;cai gui-ung phih awk vai sei kä om hleih ami gai ba vai suh shang neh om ci gui. Kasi hta cuh acun-ung tün neh mü-ah ang’mang k’she noh k’phlän hleih m’la neh ng’shüm lo ba hti ci.
K’cha ät vai ng’lak lo na hleih kasi-ah pa noh pigo k’kyong-ah k’chang a m’shah tüi gui neh teng m’kyein hlak gui ci. Ga k’kaap gui noh im gui am’shah mei-awn m’chih neh m’di m’dam tu lang hleih phih hteit ba neh om-ung gah-ei khai ci lo ba u hleih hteit ba neh ami im gui pyang ba neh om ci gui. K’cha ät noh ng’lak na hleih kyong im gui pyang ba neh kyong kai lo ba ci gui. Kasi cuh kyong phih kä kay ba hlü hleih apa noh ling neh am’kai tu ba. Cun te ayaan kasi-awn kä täng ba ca kia neh a saya gui, a teih püi-awn phih kä ng’gei lo tu ba ci. Mü-ah a ih-ah-ung phih m’la neh ng’shüm la ba neh kia lo pum ci. Ne tah a hngün-ung phih k’phyam lo ci. Im k’pung aluh vai phih kyü lo ci. A teih püi gi-awn phih hle hnget-awn ng’kah tu-ah ng’gü bäng ng’lah lo tu ba ci. Ng’gen nah phih a shäng ahäng va gen vü tu ci. I-ah-ung bo song lo ba hgo vai ci-ah a hlui hlak gui a ge-ah m’chäp neh tha ci.
Kasi-ah nu pa gui noh phih I hlok cha ami ci vai kä hmat u neh du nak ci gui. Müu-ah a hngün-ung a k’phyam hti cuh anu noh m’ghuih the hleih phih a kho lä düt, kya ba hti ki. A hngu-ah Elex ci-ah ng’ming nak ca sayama tumat gawk lo ci. Kasi cuh ng’tuk ng’aah nak-awn ng’pak hleih I-ang a kia ci neh ng’shi goi hleih kä hmat ci ci goi. Cun-ung ci neh Elex noh kasi noh amät-ah gup thei-ah bung nami om yah-ung kah müigup gup hlak nä ci neh pyein hleih kasi-awm shum htung lah ca ng’lap pe ni ci goi.
Netah apa noh a pei-ah ngoh neh müi a gup cuh teng neh shin cuh I-ang ci neh ng’shi hleih kasi noh müi gup teng neh tah am’lung kyong-ah ka apyein lo cuh acu mü ka teih püi hta ka k’phyon tu hlot-ah mong cuh pyein neh apa k’kyop neh kyap ci.
Shin gui cuh tün nak k’htük-ah kia ci. Kasi cuh am’lung k’kong om ci gui a pyein lon-ah kyäp kyäp-ah ng’khai lo ba ci. A k’hngu-ah ayan ka hlo-ah a teih püi-awn phih ng’khot neh ng’gü ng’lah thei ca k’hmo tumat-ah kia lo ba ci.
Burmese Catholic 2016 edition
