Tyre Mânggo ung ka Bä ciah Christina ah ghünlu a mòng
Tyre ung ka Christina cu Italy ghunkhaw Bolsena, ung ng’tüi ciah kya ci.Tyre Mânggo ung ka Christina cu yum nak lam k’khei ciah k’kyawng k’khui ung ka no ng’tüi lo ciah kya ci. A ni ah pa cu a kya ah ng’büh ng’mang ciah kya ci. A kho kum 11 be lo hleih a ni ah müihmai cu kyom hta ne van no a yum m’hngi tu ah ng’lami ah kya lo ci. Yum nak lam k’khei ciah a pa no a hta k’hngumi am nat phaya vai hlü ah m’hlüng m’tai ne phayongtaing ni a ng’ui gui m’däi ne gän ap ciah kya ci. Cun tu pang ah phih Christina cu Khanpughi bäng vah ng’müng van tüihmüt ciah khanpughi ah kya hleih a ni bäng m’shuk k’chuk vai ci ci hmat hlo ne Khanpughi ah k’khan na a m’hngi nak däm lo pi hti ciah kya ci.
Kho k’hngüpät ung Khanhtapup cu Christina ah a om nak ah hteit ne Boi Yesu ah hta k’hngumi ci ne chü ne a ni am ng’thu k’ni gui m’thei tu ne nang cu na yum nak ah phäh ah yaica buiawt nak gui na hnguh k’khai ci ne m’thein ci. A cun ah Khanpughi a yum ah mòng gui cu a pa no hmat lo ne Christina cu tukthat ne a kalu nak ah kya ci. A pa ah ci nak awn yaica ciah Christina m’htei tu ci gui ah a phan ah k’chang gui cun phih kalu na gui ne ngon gui ciah kya ci. A nu no a hta k’hngumi a mi chuum nak ah thong ung hteit ne Christina am Christian yum nak cu a nong vai ah pyein hleih Christina no cun ah k’dam ka hngun vah ka pe k’khai ci ne pyein ne a yum nak m’khän ciah kya ci. A pa no phih nat yum nak ung a ng’hlah ba vai pyein hleih Christina no kä ng’ngai hleih m’shi gui awn a hta k’hngumi cu chit ne mei k’cang ah khan ah a ghoh ah kya ci. Cun kon ah a Pa no lung gui awn chit ne m’awi ne tui ah kyong ah a ghoh ba mä ah kya ci. A pa no a hlühlü ah kalu na ne ci tu lang pang hleih phih Christina cu Khanhtapup gui no ngäng kheng geng ne m’htei u hleih Christi na cu a I ah kä kya ci vai hlü ah om ciah kya ci. A ni ah yum nak ngak tu ci gui ah k’chang 300 cun phih Christian yumtu k’chang gui ah ng’lat lo ci gui. Tyre Manggo ung ka Christina cu AD 295 ung k’khim awn k’tok ne a mi ngon ah kya ci.
