M’Cäinák a k’däm pí.( A gha-lei-hma nak kyün k’hngüp ng’neng
Cun kon-ah, m’cäinák k’piàng, tumat nawh Jesu cuh k’chü ’koih vai-ah ng’düí lo neh a ng’si lo cuh, “Nang Saza, ghin-khàw ka gah vai-ah, i ka ci vai ang?” ci neh ng’si hleih, Jesu nawh “M’Cäinák- ung a i ci neh néi ami guk vei? A i ci neh-ang, na hnguh man?” ci neh ng’si tu bà hleih, ani nawh “Na Khãnpùghí Báwi cuh na m’lung na m’chà kä k’poih-èin hleih na k’tha-gui, na lu-’chók avan-awn na m’hni vai. Cun kon-ah, na pó-k’chàng phih, na mät-a hlo-ah, na m’hni tu vai,” ci neh a m’sàng bà. Jesu nawh phih, na càng ci. A cun-ah na ci vai, ghin-khàw na gah khai,” ci neh piéin ci.Ani nawh phih, kä zo-nàü hlü neh ‘Ng’khaw k’chàng na ci cuh a u ang?’ ci neh ng’si tu bà hleih, Jesu nawh a piéin lo cuh, “k’chàng tumat, Jerusalem-a kah, Jericho-ah a htehnák-ung, gut èi gùi-awn ng’hnguh lo u neh ngami nawh a hlui-hlak ni, a säm phùng avan guh pe nehtah sih ghep ghep hleih m’ghùih neh nong ghüt ci gùi. Cun-ah lam-ung, k’tài-gü ng’vái tumat phih, kä hmat-èi neh hteit tu te ci. A k’lèim cuh, hnguh lo neh phih, ’khén neh hteh-tá ci. A cun-a hlo-ah, Levita k’chàng tumat phih, a cu zah-ah gok lo neh ani cuh, hnguh lo nehtah ’khén tu düit ci. Lam-k’hteit Samaritan tumat läí nawh ani cuh, hnguh lo neh a k’chü-ah na hleih A pèi-ah lo neh a k’hmalèim gùi, chitui lah ca-pit tui-awn m’tui nehtah pin pe ci. Cun kon-ah a mät-ah ng’hlè ’khãn-ah ng’cum hlak neh ei-zoih im tumat-ung hteh püi neh m’htéi ci. A ngói-ung, ngùi tang-kà phégoi k’plok nehtah ei k’zòi-àm pe tu neh, “Ani na m’htéi tu vai. Sin-ah phégoi-ah kon-ah, ng’pi bà khai phùng cun phih, ka lo bà-ung, ka ning m’thung-èi tu bà khai,” a ci. A i-ah na ng’ngài ci-ang, Sin-ah k’thùm-ung-kah, gut èi-ah kut-ung gok ci-ah a ng’khaw k’chàng cuh u-ah kia khai ang? ci neh Jesu nawh ng’si bà hleih, m’cäinák piàng nawh, “k’Chü-hngà neh m’htéi m’htà ci-ah k’chàng-ah kia khai,” ci neh m’sàng bà hleih Jesu nawh, “Nang phih hteit bà neh na ci tu vai néi,” ci neh piéin ci.
